"Норуоттар доҕордоһуулара" бэстэбээл

"Норуоттар доҕордоһуулара" бэстэбээлгэ хас биирдии кухня повардара, бэйэлэрин пловтарын национальнай ураты тыыннаан астаатылар. Биир бүлүүдэ сүрүн олоҕурбут рецебигэр тирэҕирэн, бу күрэххэ биир даҕаны бүлүүдэ хатыламмата. Бэриллибит бириэмэ иһигэр 8 хамаанда барыта 1 чаас 20 мүнүүтэ курдугунан пловтарын киэргэтэн бэлэм оҥордулар. Үс саха хамаандата кыттыыны ылла. Олортон биирдэстэрэ "Чолбон" остолобуой хамаандата барыта бэйэ оҕуруотуттан, хатас этиттэн буспут пловтара элбэх ыалдьыт биһирэбилин ылла.

"Дьигинэ, барыта судургу, туох да кистэлэҥ суох. Моркуоп, луук, эт, туус, пиэрэс, сытыы тума уонна рис, бүттэ", - диир "Норуоттар доҕордоһуулара" бэстэбээл кыттыылааҕа Ньургустаан Аммосов.

Бэстэбээл дьүүллүүр хамыһыйатынан "Тыгын Дархан" ресторан шеф-повара Константин Матаннанов, Москва куораттан кэлбит   шеф-повар Александр Пантюков уонна атыы-эргиэн департаменын үлэһитэ Гаврил Харлампьев  буоллулар. Бастатан туран, дьүүллүүр сүбэ астаныллыбыт бүлүүдэ минньигэһигэр болҕомто уурда. Ол кэнниттэн киэргэтиитин, буһарыллыбыт тиэхиньикэтин болҕомтоҕо ыллылар.

"Плов көрүҥэ аһары элбэх. Сахалыы диэҥҥэ, мин санаабар, олохтоох бородууксуйа киириэхтээх. Бэйэ оҕуруот аһа уонна бэйэ этэ. Биһиги убаһабыт да, сибиинньэ да этэ буоллун, ынах, таба этэ эмиэ баар. Чэ, киһи арастаан буһарыан сөп. Мин холобур, урут бэйэм анды этинэн буһара сылдьыбытым", - диэн "Тыгын Дархан" ресторан шеф-повара Константин Матаннанов кэпсээтэ.

Аһаҕас халлаан анныгар повардар дьон иннигэр астаан көрдөрдүлэр. Паарка ыалдьыттара ким төһө ыраас туттунуулааҕын, астааһыныгар туох уратыны туттарын барытын бэлиэтии көрдүлэр. Ким эрэ пловугар лимон эбэр, оттон сорохтор бараан иһэ буспут арыытыгар лууктарын буһардылар. Хас биирдии омук бу аска бэйэтэ туспа  сыһыанын бэстэбээл көрдөрдө.

"Пловпут аата "Местный" диэн буолла. Тоҕо диэтэр, барыта мархатааҕы сибиинньэттэн уонна олохтоох оҕуруот аһыттан ылыллыбыт. Пловпут уратыта диэн, Саха сирин аһын тарҕата сатыыбыт. Дьон олус сөбүлүүр плову, ол иһин оҥорбуппут ыраатта", - диэн этэр "Норуоттар доҕордоһуулара" бэстэбээл кыттыылааҕа Туйаара Ефремова.

Норуоттар икки ардыларыгар или-эйэни бөҕөргөтөр сыаллаах ыытыллыбыт бэстэбээлгэ дьон-сэргэ үөрүүтэ үксээтэ. Сынньалан паарката минньигэс плов сытынан аҕыйах мүнүүтэ иһигэр дыргыйа оҕуста. Асчыттар бэйэлэрин национальнай таҥастарын кэтэн, бүлүүдэлэрин сыанаҕа тахсан кэпсээтилэр. Бэстэбээл инникитин да тиһигин быспакка ыытыллар буолуоҕа диэн тэрийээччилэр эрэллээхтэр.

"Биһиги бу Дьокуускай куорат төрөөбүт күнүгэр анааммыт, бастакытын плов бэстэбээлин тэрийдибит. Дьокуускайга билэргит курдук, элбэх норуот олорор. Ол иһин диаспаралары түмэммит бэстибээл оҥордубут", - диэн Дьокуускай куорат уокуругун дьаһалтатын урбаан уонна туризм салаатын начальнига Гаврил Харлампьев иһитиннэрдэ.

Бастакы миэстэни Ислимжон Шамшиев хамаандата ылла, оттон иккис миэстэни Мухадаммазис Мирмахмудов, үһүс бириистээх миэстэҕэ Спортивнай база хамаандата тигистэ.