Өрөспүүбүлүкэтээҕи "Урбаанньыт ийэлэр" бырагыраамма

Арассыыйа үрдүнэн "Урбаан ийэлэр" бырайыак 2016 сыллаахтан тэриллэн ыытыллар. Быйыл Саха сиригэр 5 төгүлэ буолар. Бырайыак сыалынан ийэлэр бэйэлэрин дьыалаларын арынан, ону сайыннарыылара буолар. Хас биирдии кытта кэлбит кэрэ аҥаарга бырайыагын оҥорон таһаарыытыгар туһааннаах испэсэлиистэр ананан үлэлэһэллэр. Бырагыраама бүтүүтэ бастыҥ бырайыак 100 тыыһынча харчылаах грант ылары ситиһиэ. Онтон сэтинньи ыйга ыытыллар Дойду үрдүнэн сүүмэрдэммит 30 күрэхтээһээччи иһигэр киирэн,  1 мөлүйүөн суумманы ылар кыахтаныа.

"Ийэ буолан баран дьахтар өйө-санаата барыта күүскэ уларыйар. Кини олорон эрэ инники олоҕун, тугу гынарын, баҕарарын толкуйдуур. Ол иһин Өрөспүүбүлүкэбитигэр маннык бырагыраамманы ыыта сылдьабыт. Сорохторо бэйэлэрэ бизнес бырайыактаах кэллилэр, сорохтор идиэйэлээхтэр. Бу идиэйэлэрин сайыннараллар, билигин барытын суоттууллар, көрөллөр. Ким эмит идиэйэтэ баҕар уларыйыан сөп", - диэн "Мой бизнес" киин преподавателэ Ульяна Сидорова иһитиннэрдэ.

"Мамы предприниматели.рф" саайтка уопсайа 90 тахса ийэ сайаапкаламмыта. Олор истэриттэн саамай чаҕылхай бизнес бырайыактаахтар талыллан, бүгүн 35 ийэ кэлэн олорор. 4 күн устата кинилэр бизнес былааны хайдах сөпкө оҥорорго, аҕыйах үптэн элбэх харчыны эргинэргэ уонна сөптөөх барыһырыы туһунан үөрэх ааһыахтара.

"Урбаан хайысхатын туһунан толору, сиһиилии арыйаннар кэпсииллэр диэн бэлиэтээн көрдүм. Бэйэм билиибин, нууччалыы эттэххэ монтизируйдаан, холобура социальнай бырайыактааһын эйгэтигэр биирдиилээн кэммиэрчискэйэ суох тэрилтэлэргэ, актыбыыстарга бырайыак суруйарга уонна грантовай куонкурстарга кыттарга көмө оҥорорбун", - диир Горнай улууһуттан урбаан ийэ Сардаана Туралысова.

Манна кэлбит ийэлэр бэйэ-бэйэлэрин кытта уопут атастаһан, билиилэрин хаҥаталлар. Хас биирдиилэрэ толкуйунан чугас маарынныыр кыргыттары булан, инникитин бииргэ үлэлэһэр туһунан номнуо кэпсэтии ыытан сылдьаллар. Холобур, таҥас-сап, ас-үөл хайысхатыгар бизнес планнаах ийэлэргэ, сайт оҥорон биэрэр ийэлэргэ клиент буолаллар.

"Саҥа саҕалааччыларга, холобура, аан бастакыттан стартап ыларга олус көмөлөөх эбит диэн буолла. Мин иккис күнүм, бэҕэһээ олус киэҥник билиһиннэрбиттэрэ. Бүгүн нолуок туһунан интириэһинэйдик кэпсээтилэр. Тэрээһиҥҥэ сылдьар, үөрэҕи ылар кыргыттарга туһалаах бырагыраамма буола турарыттан үөрэбин", - диэн Чурапчы улууһуттан урбаан ийэ  Анастасия Афанасьева санаатын үллэһиннэ.

Бүлүү улууһуттан сылдьар икки оҕолоох ийэ, Бандерова Сардаана, идэтинэн техник-программист. Кини салгыы идэтин суолун сайыннаран веб разработка хайысхаҕа бизнес былаанын оҥоро сылдьар. Үйэбит сайдыыта тэтимирэн, билигин хас биирдии урбаанньыт анал саайтаах буоларыгар наадыйар. Ол иһин ити өҥө билигин ирдэнэр буолан, бэйэтин бырайыагар саарбаҕа суох.

"Бэйэм дьыалабын тэриниэхпин наада диэн санааттан, толкуйдаан киирэн барбытым. Уонна былырыын социальнай контракт түһэрсибитим. Ситэри сайдарга диэн манна кэллим", - диэн Бүлүү улууһуттан урбаан ийэ Бандерова Сардаана этэр.

Бырагыраама түмүгэр, хас биирдии ийэ бырайыагын хамыһыйа иннигэр көмүскүөҕэ. Кэлбит ийэлэр аҥаардас кыайыы эрэ туһугар буолбакка, бастатан туран уопут уонна билии атастаһа кэлбиттэрин бэлиэтээтилэр.