Хочуолунайдары кыстыкка бэлэмнээһин тэтимнээхтик барар

Олох-дьаһах коммунальнай сулууспа үлэһиттэригэр билигин саамай эппиэтинэстээх кэм. Кылгас сайыны баттаһа өрөмүөн үлэтин үгэнигэр сылдьаллар. Үһүс сылын "Теплоэнергия" тэрилтэ хочуолунайдарын өрөмүөннээн кэлбит Илья Христофорович күннэтэ тимири иһэрдэр. Хочуолунай сүрэҕэ - оһох. Онон сүрүн болҕомто онно ууруллар.

Илья Рожин, сварщик: «Ханнык баҕарар үлэ ыарахаттардаах. Мин дьоҥҥо сылааһы биэриэхпин наада. Ол туһуттан хочуолунайдар кыстыкка этэҥҥэ үлэлииллэрин инниттэн билигин сыбаарка үлэтин оҥоробун”.

Билиҥҥи туругунан өрөмүөн үлэтин сүрүн чааһа силигин ситэн, түмүктэнэрэ чугаһаата. Былааннаммыт үлэ сөпкө бириэмэтигэр ыытыллан иһэр диэн "Теплоэнергия" тэрилтэ салалтата иһитиннэрэр. Бастатан туран хочуолунайдары уонна ититии ситимин тупсарыы, уһун кыһын устата тохтобула суох үлэлиирин хааччыйыы буолар. Тэрилтэ киин куоракка 700 үлэһиттээҕиттэн 400 өрөмүөн үлэтинэн дьарыктана сылдьар.

Гаврил Наумов, сүрүн инженер солбуйааччыта: «Кыстыкка бэлэмнэнэн өрөмүөн үлэтэ бара турар. 140 оһох өрөмүөннэниэхтээҕиттэн билигин 126 бэлэм. Ол аата 86% толорбудут. Онтон ититии уонна уу ситимигэр 40 килэмиэтири өрөмүөннүүр былааннаахпыт. Онтон күн бүгүн 36% оҥордубут».

Сайыҥҥы кэмҥэ хочуолунайдар үлэлэрин тохтоппоттор. Дьиэлэргэ сылаас ууну тиэрдээри оһохторун кыра кыамтаҕа холбоон үлэлии олороллор. Былааннаммыт үлэлэрин атырдьах ыйын саҥатыгар түмүктүүр былааннаахтар.

Октябрьскай энергооройуоҥҥа үлэ 50% ыытыллан турар. Манна 3 оһоххо хапытаалынай өрөмүөн үлэтин ыыта сылдьаллар. Сүрүн болҕомто дьиэлэргэ барар ититии ситимин ыраастааһыҥҥа уонна тэстии үөскээбэтин туһугар анал гидравлическай тургутуулары оҥороллор.

Үгэс быһыытынан сылаас үгүс дьиэлэргэ балаҕан ыйын 1 күнүгэр бэриллэр. Ол эрэн итиини биэрии киин куорат салалтатын уурааҕынан ыытыллар, онон аны күһүҥҥэ диэри  туох баар оһохторун, ититии ситимин бэлэмнээн уһун тымныы кыһыны көрсөөрү бары күүһү уураллар.