Үлэ сылынан үлэ коллективтара доруобуйаларын көрдөрөллөр

Өрөспүүбүлүкэтээҕи доруобуйа уонна ыарыыны сэрэтэр кииҥҥэ национальнай архыып үлэһиттэрэ доруобуйаларын бэрэбиэркэлэтэллэр. Манна аан бастаан кэлбит киһи хайаан да терапевт хоһугар киирэн көрдөрүнэр. Ол кэннэ дьэ атын быраастары кэрийбитинэн барар.

Надежда Попова, Өрөспүүбүлүкэтээҕи доруобуйа уонна ыарыыны сэрэтэр киин терапевт бырааһа: «Уһуннарын, ыйааһыннарын мээрэйдиибит. Онтон исписэлиистэринэн ыытабыт. Кардиолог, офтальмолог, невролог уонна УЗИ бырааһа бааллар».

Өрөспүүбүлүкэҕэ Үлэ сылын чэрчитинэн «Саха сирин нэһилиэнньэтин доруобуйатын бөҕөргөтүү» бырагыраамматын иитинэн, бу сыл саҥатыттан үлэ коллективтара күргүөмүнэн медицинскэй көрүүнү ааһаллар. Саамай сүрүнэ уочарата, үтүрүһүүтэ-анньыһыыта суох тустаах быраастарга көрдөрүнэн, бэйэлэрин доруобуйаларын туруктарын билэллэригэр туһуланар. Национальнай архыып үлэһиттэрэ 31 буолан икки бөлөҕүнэн арахсан күн аҥарын иһигэр көрдөрүнэн бүттүлэр.

Венера Тихонова, СӨ национальнай архыыбын тэрийэр-правовой салаатын салайааччыта: «Биһиги тэрилтэбит сыллааҕы медицинскэй көрүүнү аастыбыт. Икки ый инниттэн сайаапкалаһаммыт, биир күн барытын ааастыбыт. Биир да уочарат суох. Исписэлиистэр олус болҕомтолоохтук көрөллөр-истэллэр. Наадыйар дьоҥҥо бастакы көмө быһыытынан эми-тому анаатылар».

Маннык коллективынан көрдөрүнүүнү ханнык баҕарар тэрилтэ сайаапка түһэрэн, бары биир күн кэлиэхтэрин сөп. Бу барыта ыарыыны эрдэтинэ булан, эмтээһин үлэтин сөпкө бириэмэтигэр саҕалааһын буолар. Саамай сүрүнэ сахарнай диабет, холестерин үрдээһинин, хаан баттааһынын ыарыытын булуу. Онно анаан тустаах анализтары тутатына миэстигэр ылан, экспресс-тест нөҥүө быһаараллар. Өскөтүн анализ кутталлаах кэрчиги көрдөрдөҕүнэ өссө дириҥэтэн туран чинчийэн көрөн, дьэ чопчу эппиэти ылаллар.

Алёна Местникова, Өрөспүүбүлүкэтээҕи доруобуйа уонна ыарыыны сэрэтэр киин көһө сылдьар биригээдэлэр сэбиэдиссэйэ: «Үлэбит сүнньүнэн ыарыыны эрдэ булааһынан дьарыктанабыт. Ол курдук, бастатан тура, саахардарын көрөбүт. Онтон үрдүк буоллаҕына эндокринологка ыытабыт. Онтон чопчу дианоз турдаҕына бэйэтин поликлиникатыгар учуокка турар».

Бу маннык хабааннаах тэрээһин сылын ахсын ыытыллар. Ол эрэн үлэ сылын чэрчитинэн көрөр быраас ахсаана, ыытыллар анализтар, чинчийиилэр элбээбит.  Сыл устата ханнык баҕарар тэрилтэ үлэ кэлэктиибинэн кэлэн көрдөрүнүөн сөп.