Айталина Максимова 15 төгүлүн ийэ буолла.

Дохсун ытыс тыаһынан өрөспүүбүлүкэҕэ биир соҕотох 15 оҕо амарах ийэтэ Айталина Максимова кырачан кыыһын кытары, кэргэнинээн көрсө, балыыһаттан тахсаары анал хоско тахсар. Көрсүһүү бастакы мүнүүтэлэрэ саамай долгутуулаахтар. Күн бүгүн саҥа күн сирин көрбүт кырачаан киһини көрө, алгыс тылларын этэ Дьокуускайдааҕы перинатальнай киин үлэһиттэрэ, быраастар, социальнай харалта үлэһиттэрэ итиэннэ биир дойдулаахтара Максимовтары эҕэрдэлии кэллилэр.

Чахчы, өрөспүүбүлүкэ демографиятын историятыгар биир бэлиэ түгэн -  Максимовтар дьиэ кэргэттэригэр Үйэ оҕото диэн 105 тыһ солкуобайдаах сертификаты итиэннэ бэлэх арааһын туттардылар. Максимовтар 15 оҕолоро күн сирин этэҥҥэ көрбүт. Туруга этэҥҥэ.

Айталина Максимова, герой-ийэ: "Кыра уолбар ханыы буоллун диэн оҕолоннум. Оҕо күүтэр кэмим этэҥҥэ ааспыта. Уопсайынан оҕолорбор барыларыгар этэҥҥэ аһарыммытым. Оҕолорбун барыларын бэйэм төрөөбүтүм. Кыыспыт уһуна 54 см, ыйааһына 3660 гр.".

Сергей Максимов, элбэх оҕолоох аҕа: "Кэтэһиилээх оҕобут күн сирин көрбүтүттэн олус диэн үөрдүбүт. Уон төрдүс оҕобут номнуо сүүрэ сылдьар".

Максимовтар дьиэ кэргэн онон 7 кэрэчээнэ кыыс оҕолоохтор уонна 8 оторой-моторой уолаттардаахтар. Саамай улахан кыыстара 24 саастаах уонна бу эһээхэйдэрэ. Ыал Сунтаар улууһуттан Тулагы-Киллэм нэһилиэгин Сыырдааҕар көһөн кэлбиттэрэ.  Судаарыстыба өттүттэн көмө толору бэриллэ турар.

Семён Матвеев, Дьокуускай куорат нэһилиэнньэтин социальнай харыстабылын уонна үлэтин салалтатын салайааччыта: "Максимовтарга “Үйэ оҕото” хапытаалы туттардыбыт. Маны сэргэ биир кэмнээх көмө харчыга сайабылыанньа суруйуохтара. Онтон “Үйэ оҕото”  хапытаала барыта 5352 оҕоҕо ананна. Мантан 2254 дьиэ кэргэн тутунна”.

Манна даҕатан эттэххэ, бу миэрэнэн туһаныан баҕалаах дьиэ кэргэн, тустаах биэдэмистибэҕэ кэлэн сайабылыанньа суруйуохтарын сөп. Номнуо Дьокуускай куорат үрдүнэн 678 киһи сайабылыанньа суруйан, 326 киһи харчытын илиитигэр тутта. Санатар эбит буоллахха, соторутааҕыта Саха сиригэр мөлүйүөн ахсааннаах оҕо Онуфриевтар дьиэ кэргэттэригэр күн сирин көрбүтэ.Оттон сыл саҕаланыаҕыттан Саха сиригэр 5 тыһ тахса оҕо күн сирин көрбүт.