Хотугу норуоттар култуураларын көрдөрөр быыстапка арылынна

Киирбэт күннээх хоту дойду  кустуга уонна дьүкээбил  уоттарын дьэрэкээн өҥнөрө долган норуотун төрүт таҥаһыгар тиһиллэр. Кинилэр өҥнөөх хоруоҥканан киэргэтиллибит көрүөхтэн кэрэ таҥастарынан  уратылаһаллар. София Захарова омугунан долган, билигин кэргэн тахсан Аллараа Халымаҕа олорор. Онон кини үлэлэригэр дойду ахтылҕанын тыына көстөр. "Северная Мозаика" быыстапкаҕа оҕо сааһыттан дьүөгэтинээн Афина Дариановалыын кытталлар. Кинилэр төрүт таҥаһы сөргүтүүгэ үлэлэһэллэр. Холобур буолан күннээҕи олоххо киэргэллэри, долганныы таҥаһы кэтэллэр. 

"Мастарскыай арыммыппыт уонна оҕолорбутугар таҥаспытын кэтэн киирэр буолбуппут. Мин долгаанныы, дьүөгэм Афина эбэнкилии. Ол кэнниттэн көҕүлээн, билигин эдэр ыччат оҕолорун оҕуруонан таҥыннараллар, бэйэлэрэ эмиэ таҥналлар. Мин санаабар, дьон кэтэригэр көх биэрбиппит буолуо", - диир иистэнньэҥ София Захарова.

Долганнар аҕыйах ахсааннаах норуоттартан саамай эдэр норуот. Сахалар, эбэҥкилэр уонна нууччалар буккуспуттарын түмүгэр тахсыбыт омук. Онон 3 норуот култууратын илдьэ сылдьаллар. Холобура, соннорун быһыыта нууччалыы мундирга майгынныыр, онтон ыстаан диэни күн бүгүҥҥэ диэри, сахалыы умнуллубут тылынан сыалыйа диэн тутталлар. Дьүөгэлии иистэнньэҥнэр бэйэлэрин улуустарыгар төрүт таҥаһы сөргүтүүгэ, тарҕатыыга уһун сылларга үлэлээн билигин норуот маастарын аатын ылаары тус быыспака тэрийдилэр.

"Оҕо эрдэхпиттэн иистэнэбин, бу быыстапкаҕа диэн 2014 сыллаахтан саҕалаабытым. Сүрүннээн, бэйэбитигэр тиктээччибит. Ийэлээҕим табаһыттар, куруутун тыаҕа сылдьыбыттара. Онон тыаҕа сылдьар таҥастарын тиктэллэр буоллаҕа, онтон биһиги кэнники киэргэтэн, оҕуруолаан аныгылыы соҕус матыыптаабыппыт", - диэн иистэнньэҥ Афина Дарианова кэпсиир.

Аҕыйах ахсааннаах норуоттар талба талааннаах иистэнньэҥнэрин "Аборикенка" диэн холбоһук  28 сыл устата салайан түмэн кэллэ. Бу сыллар тухары илиинэн иистэнэр хоту дойду уран тарбахтаахтарын араас быыстапкаларга тэрийэн, кытыннаран үгүс ситиһиилэннилэр.  "Северная мозаика" быыстапка эмиэ бу түмсүү иһинэн ыытыллар. Онон София Захарова уонна Афина Дарианова үлэлэрин таһынан "Аборигенкалар" холбоһуктаах үлэлэрэ турда.

"Иис эрэ дьарыга буолбатах, национальнай таҥас историятын үөрэтэбит, бэйэбит да теория өттүнэн сайдабыт. Ол курдук, Ия Кимовна салалтатынан, номнуо икки кинигэни бэчээттээн таһааран маастардарбытыгар бэлэх ууннубут. Ону элбэх киһи туһанар", - диэн  СӨ норуодунай маастара  Антонина Христофорова үллэһиннэ.

Өлөөн улууһуттан маастар Надежда Степанова үлэлэрин киһи эрэ сөҕө- махтайа көрөр. Бу луус үрүҥ уонна хара өҥү хото туттар эбит буоллаҕына, Дьэлиҥдэ нэһилиэгэ Анаабыр улууһун кытары быысаһар буолан долган искусствотын ылыныы баар. Маны дьэрэкээн өҥнөргө көрүөххэ сөп.  Эбээн, эбэҥки, долган уонна чукча норуоттарын култууратын уратытын көрдөрөр быыстапка бу ый 18 күнүгэр диэри "Симэх" галереяҕа  көрдөрүүгэ туруоҕа.