Тулагылар ууну кэтэспэккэ ынах сүөһүнү куоттараллар

Сыллата ууга барар кутталлаах Өлүөнэ эбэ сүнньүгэр сытар Тулагы-Киллэм нэһилиэгэ сааскы халааҥҥа бэлэмнэниитин саҕалаата. Ол курдук билигин олохтоох нэһилиэнньэҕэ сэрэтэр иһитиннэриилэри, ыксаллаах быһыы-майгы түгэнигэр тугу гыныахтааҕы өйдөтүүлэри тарҕаталлар. Маныаха манна суһал ыстаап тэрилиннэ.

Егор Попов, "Тулагы-Киллэм нэһилиэгэ" МТ баһылыга: "Быйыл муус барыыта, тустаах исписэлиистэр этэллэринэн, уустук буолуо. Биһиэхэ  сыл аайы буоларын курдук былааннаммыт үлэлэр бардылар. Билигин  ыаллары кэрийэн сэрэтии оҥоробут, илии баттатан анал биллэриини туттартыыбыт.  Уу кэлэрин күүппэккэбит  100- чэкэ ынах сүөһүнү көһөрүөхпүт. Уу кыратык да кэлэр сылларыгар намыһах сиргэ олорор 10-ча ыалы сыллата уу ылар, онтон уу таһымыттан көрөн Капитоновкаҕа, Киллэмҥэ ыаллар ууга быарыахтарын сеп".

Онон билигин сэрэтэр үлэлэр күүстээхтик ыытыллаллар. Быйыл олохтоох дьаһалта өйөбүлүнэн аан бастакытын суһал ыстаап тэриллэн үлэтин саҕалаата. Манна сүрүн көмөнү анал байыаннай дьайыыга баҕа өттүнэн бараары сылдьар уолаттарбыт уонна Дьокуускай куорат Аҕа түмсүүтүн чилиэттэрэ оҥоруохтара.

Яков Оконешников, Дьокуускай куорат Аҕа сүбэтин бэрэссэдээтэлин солбуйааччы: “Уопсайа аҕа түмсүүтүттэн 50 киһи баар. Хааччыллыы толору. Билигин түүннэри – күнүстэри кэтээһининэн дьарыктанабыт. Сүөһүнү, сылгыны илдьиигэ көмөлөһүөхпүт”.

Тулагы-Киллэм нэһилиэнньэтин ахсаана 2000 кэриҥэ киһи. Сүөһү-сылгы ахсаана да элбэх, онон ыксаллаах быһыы-майгы буолар түгэнигэр маннык ыстаап олохтоохторго улахан төһүү буолуоҕа. Маныаха тустаах нэһилиэккэ эрэ буолбакка, суһал ыстаап кыттыылахтара Хатастарга, Табаҕаларга,  онтон да атын куорат таьынааҕы нэһилиэктэрэгэ көмөҕө барыахтара.

Николай Мартынов, суһал ыстаап салайааччыта: “Өрүс ааһар кэмигэр көмө курдук буолабыт. Биһиги ыксаллаах быһыы-майгы сулууспатын үлэһиттэрин толору хонтуруолларыгар киирэн үлэлэһэбит, кинилэргэ илии-атах буолан көмөлөһөбүт”.  

Былырыын Тулагы-Киллэмҥэ үгүс ыал ууга баран, быйыл первентивнай миэрэлэр инники күөҥҥэ. Билигин бары кэтэһии эрэһиимигэр олороллор.