АГАТУ 80 тыһыынча рассаданы үүннэриэ

Бэйэ оҕуруот аһын олордуута билиҥҥи уустук кэмҥэ ордук тоҕоостоох. Арктикатааҕы агротехнологическай университет быйыл  80 тыһыынчаттан тахса рассада олордор соруктаах. Оҕуруот аһын уонна сибэкки арааһын үгэс быһыытынан нэһилиэнньэҕэ, тэрилтэлэргэ сотору кэминэн атыыга таһаарыахтара. Рассада үүннэриитин, көрүүтүн-истиитин түбүктээх үлэтигэр агроном идэтигэр уһуйуллар устудьуоннар күүс-көмө буолаллар.

Ойуур хаһаайыстыбатын үлэһитин идэтигэр уһуйулла сылдьар Арктикатааҕы агротехнологическай университет бастакы кууруһун устудьуона Яков Яковлев практикатын бара сылдьар. Икки ый устата ыытыллар практикаҕа устудьуоннар, уоллуун-кыыстыын бары рассада олордуутугар, көрүүтүгэр-истиитигэр күүс-көмө буолаллар.

Яков Яковлев, ойуур комплексын уонна сири оҥоруу факультетын устудьуона: " Рассадаларбытын иһиттэргэ көһөртөөрү буорун бэлэмниибит".

Ханнык баҕарар үүнээйигэ буор туруга тыын суолтаны ылар. Эрдэттэн рассада буорун бэлэмнээн, туох баар ирдэнэр састаабын кутан, көпсөркөй гына салгыннаан,  кыра ыстакааннарга кутан бэлэмнииллэр. Ирина Корякина агроном идэтигэр үөрэнэр.

Ирина Корякина, агротехнологическай факультет устудьуона:"Практикабытын бара сылдьабыт. Билигин иһиттэргэ көһөрүү үлэтигэр күүскэ үлэлиибит. Хас биирдии ыстакааны бэлиэтиибит. Маны таһынан атын үүнээйилэргэ уу кутабыт".

Арктикатааҕы агротехнологическай университет теплицэтэ. 4 сыллааҕыта поликарбонат теплицэ тутан үлэҕэ киллэрэн саас, сайын ахсын үлэ  күөстүү оргуйар. Үтүмэн элбэх, барыта уонунан көрүҥ рассада эгэлгэтэ тэлгэммит. Барыта холбоон, оҕуруот астыын, сибэккилиин 80 тыһыынчаттан тахса рассаданы олордор соркутаахтар. Бу биллэн турар барыта сыралаах үлэ түмүгэ. Күннэтэ үүнээйилэри университет преподавателлэрэ салайааччылаах  бөлөх көрөр-истэр, бүөбэйдиир. 

Мария Лукина, агрономия уонна химия кафедратын старшай преподавателэ: "Үүнээйи модьу- таҕа гына улаатырыгар үүннэриллэр болдьохторун тутуһуу улахан оруоллаах. Быйыл олус элбээх уулаах-хаардаах саас буолла, онон үүнэйилэр хойутаан таһырдьа тахсаллара буолуо. Ол иһин рассада наһаа үүнэн хаалбатын диэн кэмигэр олордуллара ордук".

Оҕуруот аһын уонтан тахса көрүҥүн сыллата олордоллор. Холобура, оҕурсу 5 суордун, помидор 6 суордун, биэрэс 4 суортарын ыһаллар. Ону тэҥэ сүбүөкүлэ, патисон, хаппыыста, кабачок, баклажан, арбуз рассадалара бааллар. Сибэккигэ эмиэ ураты болҕомтону ууруллар. Холобура,  дьэрэкээн петуния номнуо ситэн сибэккилээн туланы киэргэтэ турар.

 Быйыл 35 көрүҥ сибэккини ыспыттар. Олор истэригэр бархатцы, флокс, петуния, роза курдук дьэрэкээн үүнээйилэр бааллар.

Олунньу ыйтан рассадалары олордон саҕалаабыттар. Онон билигин үлэ үгэнэ. Хас биирдии үүнээйигэ болҕомтолоох сыһыан, кыһамньы ирдэнэр. Оҕуруот аһыгар, сибэккигэ тус-тустуһунан уу кутуута, уоҕурдууну туһаныы туттуллар.

Айысхаана Васильева, агрономия уонна химия кафедратын преподавателэ: "Биһиги рассадаларбытын эбии аһатабыт. Ол курдук циркон, эпин, корневин диэннэри туттабыт уонна минеральнай уоҕурдуулары туһанабыт".

Сотору кэминэн, ыам ыйын ортотуттан рассадаларын нэһилиэнньэҕэ атыыга таһаарыахтара. Манна биирдиилээн да дьон кэлэн атыылаһар, тэрилтэлэр да сакаастыыллар. Биир сааскы күн - сылы аһатар. Онон кылгас сайыммыт устата бэйэ иҥэмтиэлээх оҕуруотун, үүнээйитин хото олордон, өлгөм үүнүүнү ылыахха сөп.