Дьокуускайга хаар уутун ыраастыыр үлэни күүһүрдэллэр

Быйыл хаһааҥҥытааҕар да элбэх сөҥүү түһэн суолу ыраастыыр сулууспалар үгүс күчүмэҕэйи көрүстүлэр. Ол курдук, бу сааскы ыйдар саҕаланыахтарыттан куорат сулууспалара 7,5 тыһыынчаттан тахса миэтирэ кууб ууну оботтордулар. 770 тыһ. хаары тиэйдилэр. Оттон бу күннэргэ Өрөспүүбүлүкэ бастакы вице-премьера Дмитрий Садовников киин куораты кэрийэн туһааннаах сулууспалар үлэлэрин көрдө. Кини куоракка эбии тиэхиникэ уонна үлэһит бэриллиэ диэн эттэ. 

“Куоракка сүүстэн тахса ыарахан учаастак баар. Биһиги аадырыстарын  барытын билэбит. Бүгүҥҥү күҥҥэ, аадырыстарынан фикальнай массыыналар сылдьаллар. Уу үксүн эбиэтттэн киэһээ тахсар, мунньуллар. Онтон ураты үлэлэр диэн, лотуоктарбытын ыраастыы сылдьабыт. Түүн тоҥорор, сылытабыт. Күн ахсын үлэ барар.  Уонна күн сылыйдаҕына, 48 носуоспутун холбуохпут. Ол кэнниттэн уубут барара түргэтиэҕэ”, - диир Дьокуускай куорат хаһаайыстыбатын эксплуатациялыыр сулууспа салайааччыта Владимир Аммосов.

Онон билигин Дьокуускайы ууттан-хаартан ыраастыыр сулууспалар түүннэри-күнүстэри үлэлииллэр. Хаары суукканы эргиччи таһаллар. Манна анаан 30 техиникэ үлэлиир. 3 полигон баар. Сэбиэскэй аармыйа 50 сыла уулуссаҕа баар полигон туолан, Бүлүү переулогар, Хатыҥ үрэх шоссетыгар тиэйэн эрэллэр.