Амма улууһун Болугур нэһилиэгэр Туос ураһа тутуллан киирдэ

Саха төрүт култууратыгар олоҕурбут үлэ үтүө түмүгүнэн, саха итэҕэллээх омук буоларын кэрэһилиир, өбүгэ үйэлээх үгэһин салгыыр туос ураһа сандаарда. Болугур нэһилиэгэр 2015 сылтан Кулун атах култуурата бырайыак сөргүтэр, үйэтитэр, булуллубут култуураны киэн эйгэҕэ сырдатар сыаллаах үлэлиир. Бырайыак чэрчитинэн Мандар Ууһу кытта үлэлэһэн туос ураһа тутуллан олоххо киирдэ.

Андрей Петров, Амма улууһун Болугур нэһилиэгин баһылыга: «ППМИ бырагырааматынан буолла. Өрөспүүбүлүкэттэн 2 мөл. субсидия ылбыппыт. Ол таһынан, нэһилиэнньэ харчы кыттыста, спонсордарбыт көмөлөстүлэр».

Бу туос ураһа Амма улууһугар бастакы хараҥаччы буолар. Тутааччылар Таатта улууһугар Мандар Ууска хаста да тиийэн сүбэ-ама ылан, үйэлээх тутууну саҕалаабыттара. Туос ураһаны тутарга элбэх киһи үлэлэстэ. Ураһаны, сэргэлэри, көҥдөйүн тутуутугар тус-туспа биригээдэ үлэлээтэ.

Иван Афанасьев, тутааччы: «Сүрдээх элбэх киһи кыттыста, күргүөмнээх үлэ түмүгэ бу буолар. Бастаан буор кутан, онтон сэргэлэри, сиэрдиэлэри кэрдэн. Үлэтэ барыта таһымахтарынан ааста».

Оттон ураһа туоһун таҥастааһыны, испэ - таспа туоһу тигиини Болугур нэһилиэгин  маастардара,  иистэнньэҥэрэ, эбээлэр, ийэлэр үлэлэттилэр. Нэһилиэк иистэнньэҥнэрэ Таатта Баайаҕатын «Моҕол ураһа» тутуутугар күүс-көмө буолбуттара, баай уопуту ылбыттара.

Клавдия Новикова, норуот маастара: «Үлэбитин бастаан Баайаҕаҕа саҕалаабыппыт, Мандар Ууска үлэлээбиппит. Онтон сыал сорук туруорунаммыт, төрөөбүт улууспутугар эмиэ наада эбит диэммит манна туттубут. Оһуора барыта Мандар Уус бырайыагынан».

Итиэннэ, Баайаҕа нэһилиэгин туосчуттара туос ураһаҕа хаппахчы тигэн, бэйэлэрин кылааттарын киллэристилэр, бэлэх ууннулар. Оттон, үйэлээх тутууга нэһилиэк олохтоохторо биир санаанан үлэлэһэн кэлбит кыайыылара буолар. Инникитин туос ураһа аттыгар, саха балаҕан тутуллуохтаах.

Ульяна Иванова, Болугур нэһилиэгин олохтооҕо: «Бу ойуулары, тигиитин барытын бэйэбит олохтоохтор илиибитинэн оҥордубут».

Субу курдук туос ураһа хас улуус аайы тутуллан баар буоларын туһугар Мандар Уус баҕа санаатынан, ыра санаатынан. Мандартан алгыстаммыт, туос ураһа Болугурдар үтүө холобур буолуохтун.