“Зина-Леха" сахалыы комедия иккис чааһа уһуллар

Россияҕа саамай элбэхтэ киинэ билиэтэ атыыламмыт, көстүбүт, дьон биһирэбилин ылбыт "Зина-Леха" сахалыы комедия иккис чааһа уһуллар.  Көрөөччүлэри өссө мүччүргэннээх сырыылар, көрдөөх-нардаах түгэннэр күүтэллэр. Киинэ бастакы каадырдарын Хаҥалас улууһугар устан саҕалаатылар.

Долгутуулаах түгэн тосхойон, киинэ устуутун сиэринэн, тэриэлкэ хас эмэ сүүһүнэн кыырапхатарга үнтүрүйэр. Күн бүгүн, Хаҥалас ытык сиригэр, Төхтүргэ "Зина Леха" сахалыы комедия иккис чааһа устан саҕаланна.

Саҥа уһулла сылдьар комедия, бастакы чааһыттан сүрүн уратыта - кыһыҥҥы кэми көрдөрүөҕэ. Кэлэр сыл алыптаах бырааһынньыгар саҥа дьылга - киинэ улахан экрааннарга тахсыаҕа диэн устар бөлөх иһитиннэрэр. Киинэни төрүттээччи, продюсер, сүрүн оруолу толорооччу Алексей Михайлов бу да сырыыга Леха оруолун толорор.

"Өр соҕус толкуйдаан бараммыт, түһүнэн бистибит. Тоҕо диэтэр, сахалыы киинэ үксүн сайын уһуллар. Ону арыый уларытаммыт, саҥа дьыллааҕы киинэни саха дьонугар-сэргэтигэр бэлэхтиэхпитин баҕарабыт. Устар хамнаадабыт оннунан хаалла, оператордар бөлөхтөрө толору уларыйда. Уонна худуоһунньуктар уларыйдылар", - диэн сүрүн оруолу толорооччу, киинэ продюсера Алексей Михайлов кэпсээтэ.

Комедия жанрыгар уопуттаах, киинэ бастакы чааһын туоруорааччы-режиссера, Саха тыйаатырын артыыһа Роман Дорофеев киинэ режиссерунан хаалла.

Киинэ хас да сиринэн уһуллуоҕа, бастаан Хаҥалас оройуонугар, салҕыы Амма улууһугар, Дьокуускай куоракка уонна Тулагы-Киллэм нэһилиэгэр үлэлэр ыытыллыахтара

Устар былаһааккаҕа көрөөччүлэргэ сөбүллэппит дьоруойдарбыт уобарастарын арыйаары, туруктарыгар киирэллэр. Зина оруолун - дьон вайннарынан көрөн сөбүлүүр  артыыһа Иннокентий Орестов, оттон Айта оруолун "Үүнэр көлүөнэ тыйаатырын" артыыската - Елизавета Далбараева толоруоҕа.

Онон сотору кэминэн, Россия киинэ сбордарыгар бастакы миэстэни ылбыт, Зина Леха комедия уһуллан түмүктэнэрин көһүтэбит.