Сылгы кыстыга орто диэн сыаналанар

Булгунньахтаах олохтооҕо Степан Михайлов сылгытын нэһилиэктэн чугас аһатар. Үөрүн аска биллэрбитэ номнуо ый кэриҥэ буолбут. Булгунньахтаах сирэ - уота арыы сир буолан хаһыы үчүгэй. Онуоха бу эҥэр күһүнэ уһун сылаас буолан сылгы быйыл ырыганнаабата. Арай боруу диэн от уонна бөрө куттаталыы сырытта. Онон буоларын курдук Саҥа дьыл кэннэ син биир киллэртээбит. 

"Сылгыларбын тохсунньуга киллэртээбитим. Туруктара үчүгэй. Билиҥҥи сылгы дьиэ таһыгар аһыы үөрэнэн хаалла. Быйыл хаһыыбыт үчүгэй этэ",- диэн кэтэх хаһаайыстыбалаах Степан Михайлов үллэстэр.

Булгунньахтаах нэһилиэгэр тыа хаһаайыстыбата кэнники сылларга биллэ сайынна. Ол курдук сылгы ахсаана элбиирэ бэлиэтэнэр. Сыспай сиэллээх үгүс өттө кэтэх хаһаайыстыбаҕа тутуллар. Хаһыы үчүгэй буолан быйыл туруктара этэҥҥэ, ол эрэн уопсай ахсааҥҥа борууттан 8 түөрэм туйахтаах охтуута охсор. Бу уһун күһүнтэн сылтаан дьаатырбыт оттон сылгылар сүһүрбүттэрэ. Олортон ылыллыбыт анализ түмүгүн  өрөспүүбүлүкэтээҕи ветеринария лабораториятыттан  кэтэһэллэр.   

Лена Кононова, Булгунньахтаах баһылыгын солбуйааччы: "Быйыл биһиги нэһилиэкпитигэр 800-чэкэ төбө сылгы кыстаан турар. Оппут тиийэр. Кэтэх хаһаайыстыбалар тэлгэһэлэригэр киллэрэн аһата тураллар, онтон бааһынай хаһаайыстыбалар анал күрүөлэргэ аһылыкка тутан тураллар".

Онтон өрөспүүбүлүкэҕэ кыстык орто кэминэн диэн сыаналанар. Күн бүгүн 181350 сылгы баар. Ахсаан кыратык аҕыйаабыт - 2,2 бырыһыанынан. Ол оннугар биэ ахсаана элбээбит. Балартан 47520 төбөтө тохсунньу ыйга эбии аһылыкка киирдэ. Бүтэһик иһитиннэриинэн   213 тыһ. туонна от, 18 тыһ. сиилэс уонна 8 тыһ. сенаж саппааһа хаалбыт. Бу барыллаан ааҕыынан хаалбыт 112 күҥҥэ тиийиэхтээх.

Александра Петрова, СӨ ТХМ сүөһү иитиитигэр департаменын сүрүннүүр исписэлииһэ: "Кыстыхха ыараханнык киирбиппит. Кэккэ улуустарга хойутаан ардаан, ириэри буолан хаһыы мөлтөх этэ. Бу ордук Бүлүү бөлөх уонна Илин Эҥэр улуустарга бэлиэтэммитэ. Онон бу улуустарга ордук элбэх сылгы аһылыкка киирдэ".

Хаһыы мөлтөх уонна бөрө мэнээктээбит сирдэригэр быйыл кыһын уопсайа барыта 186 сылгы оҕунна. Онтон туһааннаах министиэристибэ туруктара соччото суохтарга элбэхтик туус сиэтиини сүбэлиир. Быйыл Биэ төбөтүгэр бэриллэр төлөбүр  500 солкуобайга диэри үрдээбитэ. Бу харчы улуустарга тиийбитин кэннэ, миэстэтигэр бэрээдэк  таһааран, бирикээс оҥорон түҥэтиэҕэ.