Дьокуускайга доруобуйаларыгар хааччахтаах оҕолору үөрэтэр-иитэр үөрэх кыһатын уһуйаана үлэлээбитэ ый буолла

Доруобуйаларыгар хааччахтаах оҕолор уһуйааннара үлэлээбитэ ый буолла. 30 күн иһигэр хас да тэрээһиннэр ыытылыннылар, оҕолору кытары билсиһии ааста. Күн бүгүн хас биирдии иитиллээчи туругун сыныйан үөрэтэр диагностиканы барар, ол кэннэ киниэхэ сөптөөх ньыманы талан үөрэтэллэр.

Сардаана Луковцева, Адаптивнай биир кэлим үөрэх кыһатын оҕо уһуйаанын сэбиэдиссэйин  солбуйааччыта: «Биһи оҕолорбут дорубуйаларыгар хааччахтаах буоланнар элбэх исписэлиис үлэлэһиэн наада кинилэр сайдалларын туһугар. Биһиэхэ психолог, дефектолог, логопед, музыкальнай руководитель, физкультура дьарыктара уонна өссө куруһуоктары ыыталлар. Кыра эрдэхтэриттэн тиэхиньикэ өттүгэр сайыннарар курдук “робототехника” баар».

Уопсайа оҕо уһуйаана 200 миэстэлээх, манна 2-7 саастарыгар диэри доруобуйаларыгар хааччахтаах оҕолор үөрэнэллэр. Суолталаах эбийиэк дойдутааҕы "Образование" диэн национальнай бырайыак чэрчитинэн тутуллан үлэҕэ киирдэ.

Уоппуттаах логопед Гавриил Неустроев оҕо уһуйааныгар үлэлии кэлиэн иннинэ доруобуйаларыгар хааччахтаах оҕолору үөрэтэр уонна көмөлөһөр кииҥҥэ 8 сыл үлэлээбитэ. Оҕолору таптаан, бэйэн үлэҕин сөбүлээн үлэлиир буоллаххына сылайар диэн тугун билбэккин диэн этэр.

Гавриил Неустроев, логопед: «Таптаан сөбүлээн үлэлиибин. Бастаан саҕалыырга ыараххтар баар этилэр. Билигин номнуо 10-ча сыл курдук буолла үлэлээбитим. Ис-сүрэххиттэн үлэлиир буоллахына барыта тахсан иһэр үчүгэй баҕайытык».

Онуоха оҕо уһуйаана соҕотохтуу эрэ үлэни ыыппат, доруобуйаларыгар хааччахтаах оҕолор оскуолаларын кытары биир тэҥник ситимнээхтик үлэлиир. Уһуйааны бүтэрэн баран оҕолор маҥнайгы кылааска киирэллэр, онтон оскуолаттан кынаттаналарыгар идэлээх бүтэрэллэр. Быйылгы үөрэх дьылыгар онус кылаас диэн аһылынна.

Марина Румянцөва, Адаптивнай биир кэлим үөрэх кыһатын методииһа: «Быйыл 10 кылаас аһылынна. Бу түһүмэҕи 3 сыл ааһар манна үөрэнэр оҕо. Доруобуйаларыгар хааччахтаах оҕолорго диэн аналлаах. Онон выпускниктарбыт идэлээх тахсыахтаахтар. Идэлэрбит: иис, гончарнай, тутуу, столярнай дьыала, 3D».

Манна сотору кэминэн саҥа 150 миэстэлээх интэрнээт дьиэтэ үлэҕэ киириэҕэ. Оччотугар усулуобуйа өссө тупсуоҕа.