Бу ыйтан ыла тоҥоруу саҕалаан биллэрдик тымныйан барыаҕа

Бастакы кыһыҥҥы алтынньы ый лоп курдук ортолосто,  күн-дьыл тымныы күүһүгэр сыыйа киирэн эрэр. Алтынньы норуот итэҕэлинэн Хотой Айыы ыйа. Бу ыйга сүрүннээн 5-20 мм тиийэ хаар түһэр, орто температура 5 кыраадыстан 15 диэри тымныйар. Куобах маҥхайар, 7 чыыһылаттан күн ат хаамыытынан кылгыыр диэн ааттыыллар. Алтынныьы 14-тэн Бокуруоптан кыстыкка киирдибит. Бу күнтэн кыһыммыт саҕаланна.

Татьяна Николаева: «Норуот билгэтинэн Бокуруопка хотуттан тыалырдаҕына - кыһына тымныы, арҕааттан- ичигэс кыһын буолан диэн сылыктыыллара. Алтынньы 18-тан муус аннынан муҥхалааһын саҕаланар, күөл тааҥныыр. Ый ортотуттан тыалырдаҕына, көтөҕө түһэр. Халыҥ хаар түстэҕинэ, сылгыга үчүгэй кыһын буолар диэн билгэлииллэрэ».

Алтынньы ый быыһык кэм, онон халлаан туруга уларыйа турар. Бү күннэргэ өрөспүүбүлүкэ хоту улуустарыгар күүстээх тыаллаах-силлиэлээх буолуоҕа. Киин улуустарга температура түүнүн 15 кыраадыска тиийэ тымныйар, күнүһүн 3-5 кыраадыс тымныы турар. Үүнэр өрөбүлэргэ үгүс улуустарга сүрүннээн былыттаах кыра хаардаах, күн-дьыл турара сабаҕаланар. 

Саргылаана Никитина, Дьокуускайдааҕы күнү-дьылы кэтээн көрөр сулууспа күн-дьыл туругун сылыктыыр салаа салайааччыта: «Түүҥҥү температура билиҥҥи кэмҥэ сөп түбэһэр. Хотугулуу-илин -23,-28 кыраадыска дылы тымныйар. Киин оройуоннарга -10,-15. Оттон арҕаа -2,-7, былыттаах бириэмэтигэр. Киин куоракка сөҥүүтэ суох, түүҥҥү температура -10,-13, күнүһүн 0,-3 кыраадыс. Өрөбүл күннэргэ арҕаа былыта кэлэн киин оройуоннарга кыралаан хаардыаҕа».

Түүнүн тоҥорор, онон суол-иис халтараан. Күннэтэ суол саахала тахса турар, онон суоппардар, сатыы сылдьааччылар айан кэмигэр болҕомтолоох буолаллара ирдэнэр. Сыл саҥатыттан Саха сирин үрдүнэн киһи эчэйиилээх 600-кэ суол быһылаана тахсыбыт.

Мая Местникова, СӨ суолга куттал суох буолуутун хааччыйар судаарыстыбыннай иниспиэксийэ аҕа иниспиэктэрэ: «Билигин суол халтыраанынан сибээстээн айанньыттарга кутталлаах кэм. Тимир көлөҕүтүн техническэй туругун көрүнүн, кыһыҥҥы эрэһиинэҕэ уларытын, сөптөөх оскуораһы тутуһа сылдьын уонна сатыы сылдьар дьону көрөн аһардын, быраабыланы кэспэккэ, болҕомтолоохтук айаннаан».

Кэнники кэмҥэ күһүммүт уһаан, сымнаан иһэрэ сыл аайы биллэр буолла. Быйыл алтынньы ортотугар диэри сылаас күн-дьыл турар диэххэ сөп. Кыстык хаар хотулартан ураты улуустарга ситэ түһэ илик. Быйылгы күһүн ааспыт сылы хатылыыр диэн синоптиктар бэлиэтииллэр.