Өрөспүүбүлүкэҕэ гражданскай көмүскэлгэ бүтүн Арассыыйатааҕы дьарыктар ыытылыннылар

Уопсайа сүүһүнэн киһи уонна тиэхиньикэ, 13 сулууспа, бу барыта Саха сиригэр гражданскай көмүскэли олохтуур үлэһиттэр. Үөрэх түмүктүүр түһүмэҕэ Үс хатыҥ сиригэр ааста. Манна  Ыксаллаах быһыы-майгы үөскүүр түгэнигэр олоҕу-дьаһаҕы хааччыйыахтаах сулууспа барыта кыттыыны ыла кэллэ.

Павел Гарин, Ыксаллаах быһыы-майгы министиэристибэтин Саха сиринээҕи салалтатын салайааччыта: «Мы проводим строевой смотр всех органов управления и сил служб гражданской обороны Республики Саха (Якутия), федеральных органов исполнительной власти и республики, также организаций, отнесённых в категории по гражданской обороне».

Хас биирдии сулууспа аныгы ирдэбиллэргэ толору эппиэттиир оборудабанньанан хааччыллыылааҕын туоһулаата. Холобур, саахалга түбэспиттэргэ медицинскэй көмө үлэһиттэрэ көрдөрүүгэ мобильнай госпиталь туруордулар. Маннык дьоҕус госпиталь 5 киһини тэҥинэн эмтиир уонна стационарнай балыыһаны солбуйар кыахтаах.

Николай Татаринов, СӨ доруобуйа харыстабылын министиэристибэтин саахалга түбэспиттэргэ медицинскэй көмө өрөспүүбүлүкэтээҕи киинин суһал салаа салайааччыта: «Аныгы медиссиинэ оборудабанньата барыта баар. Холобур, бу аппарат бэйэтэ киһи сүрэҕин хачайдыыр».

Сүрүннээн бэрэбиэркэлэр уонна дьарыктар ыксаллаах быһыы-майгы үөскүүр түгэнигэр дьону быстах кэмҥэ олордор, аһатар пууннар уонна резервнэй энергетикэ хааччыллыыларын тула аастылар. Туруоруллубут сыаллар ситиһилиннилэр.

Александр Никифоров, ЫБММ Саха сиринээҕи салалтатын ыксаллаах быһыыга, гражданскай оборонаҕа уонна нэһилиэнньэ көмүскэлигэр салалтатын салайааччытын солбуйааччы: «Бу үөрэх бүтэһигэр өрөспүүбүлүкэ үрдүнэн анаалыс оҥоһуллуо, ол түмүгүнэн өрөспүүбүлүкэ хайдах гражданскай оборонаҕа бэлэмнээҕин быһаарыахпыт».

Саха сиригэр гражданскай көмүскэл сулууспалара ыксаллаах быһыы-майгы үөскүүр түгэнигэр бэлэмнээх буолалларын хааччыйар хас да бүк эппиэтинэстээх. Сайыҥҥы куйааска, кыһыҥҥы тымныыга суһал суоһаата даҕаны уустук үлэлэрэ түргэн-тарҕан хамсаныылары эрэйэр.