Дьокуускайга ыарыыны утары быһыыны туруоруу салҕанар

Дьокуускайдааҕы 3№-дээх балыыһаҕа үлэ күөстүү оргуйар. Манна күҥҥэ 50-тан тахса киһи быһыы ыла кэлэр. Улахан дьоҥҥо Флю-М, оҕолорго Гриппол диэн ааттаах вакцинаны туруораллар.

Уопсайа балаҕан ыйыттан саҕалаан вакцинаны 20 тыһынчаттан тахса киһи ылла, ол иһигэр 13 тыһынча оскуола оҕото уонна 7 тыһынча үлэһит. Быраастар вакцина туруоруохтарын иннинэ аллергияҕа, температураҕа, олохтоммут ыарыыларга бэрибиэркэ оҥороллор.

Саргылана Эверстова, Дьокуускайдааҕы 3№-дээх балыыһа профилактика салаатын сэбиэдиссэйэ: «Билигин Флю-М туруора сылдьабыт. Онно куурусса белогар аллергиялааххыт дуо, диэн ыйытабыт. Билиҥҥи кэм острай ыарыылаах ду, суох ду диэн быһаарабыт уонна ханнык эмит хроническай ыарыы бэргии сылдьарын быһаарабыт».

Исписэлиистэр вакцинаны бастатан туран кырдьаҕастарга уонна оҕолорго сүбэлииллэр.  Владислав Николаев сыл ахсын ОРВИ уонна грипп утары быһыыны ылар. Бачча ыарыы бэргиир кэмигэр эрдэттэн укуолланар суолталаах диир.

Владислав Николаев, Дьокуускай куорат олохтооҕо: «Мин санаабар, вакцинация суолталаах. Ыарыы элбэх, ыалдьыбат туһугар быһыы ыллым».

Вакцинаны ылбыт киһи иммунитета 14 күн иһигэр ыарыы утары хайдах көмүскэнэри үөрэтэр.  Уонна тумуулуур  түгэҥҥэ бэлэм буолар.

Ол эрэн быһыыны ылан баран чопчу ыарыы миэхэ сыстыбат диэн өйдөбүл сөбө суох, грипп өссө улахан, кутталлаах ыарыыларга тиэрдибэтигэр көмө буолар. 

Татьяна Протопопова, Дьокуускайдааҕы 3№-дээх балыыһа эпидемиолог бырааһа: «100% ыалдьыбаккын диэн гарантия биэрбэт. Ол өттүнэн, осложненияларга тириэрдибэт. Төһөнөн элбэх киһи быһыы ылар, оччонон коллективнай иммунитет үөскүүр уонна вирус эргиирэ кыччыыр».

Бүгүҥҥү күҥҥэ быраастар оскуолаларга, тэрилтэлэргэ тиийэн быһыы туруоруу үлэтин ыыталлар.  Онтон балыыһаларга вакцинация ахсынньы маҥнайгы күнүгэр диэри ыытыллыаҕа.