Дьокуускай куорат уокуруктарыгар хаары ыраастааһын үлэтэ барар

Сайсары уокуругугар хаары ыраастааһын үлэтэ ыытыллар, уокурук 5 үлэһитэ күн устата түбүгүрдэ, хаары күрдьэҕинэн ылаллар, тыраахтарга тийэллэр, үлэ сүрүнээн илиинэн оҥоһуллар. Күн-дьыл тымныыйан, хотуттан циклон киирэн кыстык хаар түһэн, бу курдук үлэни үксэттэ.

Уокурук эмиэ күүһүрдүллүбүт эрэһииминэн үлэлиир, тус болҕомто суол кытыытынан дьон хаамар сиригэр ууруллар. Маннык үлэни ыыппатахха араас эт-хаан эчэйиитэ тахсыан сэп.

Николай Жирков, Сайсары уокуругун олох - дьаһах хомунаалынай сулууспа салаатын үлэһитэ: «Бэйэбит дворниктардаахпыт, уулуссаларынан сылдьаллар, хомуйаллар, ыраастыыллар, кумах куталлар».

Күн-дьыл туругун кэтээн көрөр сулууспа иһитинэрэринэн салгын температурата эмискэ -5 кыраадыска диэри түстэ.

Маннык халлаан тымныйан хаар түһэрэ оҕолорго улахан үөрүү. Номнуо сыыртан хатааһылыыр олбохторун ылан таһырдьа хаарга оонньууллар. Ол эрэн оҕолорго дьол буоллаҕына,  маннык хартыына улахан дьоҥҥо кыһылаҕаны үөскэтэр.

Хаар халыҥа бу күннэргэ 5,19 см диэри тиийиэн сэп. Онтон бүгүн түүн температура -7,-9 тиийэр, онтон күнүһүн -3 кыраадыс буолар, тыал күүһэ 14 м/с диэри. Маннык тымныыларга халыҥнык таҥнар сүбэлэнэр.

Саргылаана Никитина, Дьокуускайдааҕы күнү-дьылы кэтээн көрөр сулууспа күн-дьыл туругун сылыктыыр салаа салайааччыта: «Температура -7,-9. Күнүс -1,-3 кыраадыс. Алтынньы 8,9 чыыһылаларыгар сөҥүүтэ суох, түүҥҥү температура -7,-9, күнүһүн 0,+3 кыраадыс. Өрөбүллэргэ сөҥүү түһэрэ күүтүллүбэт, түүҥҥү температура -6,-8 кыраадыс, күнүс 0 кыраадыс күүтүллэр».

Ый устата инчэҕэй хаар түһэрэ күүтүллэр. Онон хас биирдии киһи бэрт сэрэхтээх буолан, эчэйииттэн харыстаныан наада. Массыынан сылдьаччылар халтараан суолга ордук болҕомтолорун ууран айанныах тустаахтар.