Анал байыаннай дьайыыга сылдьар байыастары тиэхиньикэнэн хаачыйыы салҕанар

Труда уулуссаҕа баар өрөспүүбүлүкэ Быыһыыр сулууспатын базатыттан сотору кэминэн таһаҕастары тиэммит фура ыраах айаҥҥа хоҥнуоҕа. Уолаттар сымсатык дьоҕус хопполору, кууллары наардаан массыынаҕа угаллар. "Кыайыыга бары бииргэ" өрөспүүбүлүкэтээҕи хамыыһыйа суһал ыстааба бу сырыыга 3 массыынаны уонна гуманитарнай таһаҕаһы ыытар. 

Алексей Егоров, волонтёр: «Эбиэт диэки тиэйэн бүтэбит. Онтон Ростовка баар базабытыгар тиийэр, онтон Новоазовскайга баар базаҕа тиэйэллэр. Саха сирэ барыта көмөлөһөр, баһыылка бөҕө кэлэр».

Хас биирдии улуус туора турбакка хас биирдии байыаска төһө кыалларынан көмөлөһө олорор. Айанныыр 3 массыынаттан иккитин Амма улууһун нэһилиэктэрэ бэйэлэрин уолаттарыгар ыыталлар. Улууска "Амарах сүрэх" уопсастыбыннай тэрилтэ анал байыаннай дьайыыга сылдьар байыастары наадалаах тэрилинэн, таҥаһынан-сабынан, бородууктанан хааччыйар.

Пётр Лебедев, Амма улууһун "Амарах сүрэх" общественнай тэрилтэтин чилиэнэ: «Амма улууһун олохтоохторо, тэрилтэлэрэ сүҥкэн кылааттара».

Ааспыт нэдиэлэҕэ ыстаап эмиэ көмө баһыылкалары, таһаҕаһы хомуйан ыыппыта. Өрүс суола сабыллыар диэри үлэ тэрээһиннээхтик бара тутар. Салгыы хаайтарыы буоллаҕына Аллараа Бэстээххэ таһаҕас тиэллэн айанныыра күүтүллэр.

Алексей Егоров, волонтёр: «Аллараа Бэстээх администрацията гараж биэриэхтээх».

Балаҕан ыйын ортотуттан алтынньы бүтүөр диэри анал байыаннай эппэрээссийэҕэ кытта сылдьар байыастарга ичигэс таҥаһы-сабы хомуйуу салҕанар. "Саха сирэ эйиигин кытта" уопсастыбыннай хамсааһын волонтердара "Согреем своих" диэн аахсыйа ыыталлар. Марха олохтооҕо Аркадий Иванов кэргэнинээн иккиэн манна волонтердуу киирбиттэрэ иккис сыла. 

Аркадий Иванов, волонтёр: «6х6 кээмэйдээх 10 сиэккэни аҕыйах бириэмэ иһинэн өрөн ыытыахтаахпыт. Күһүҥҥү көрүҥү талан үлэлии-хамныы сылдьабыт».

Сыл саҥатыттан Саха сирин олохтоохторо байыастарга 100-тэн тахса тиэхиньикэни, 250 туоннаттан тахса гуманитарнай көмөнү ыыттылар.