Хаҥалас улууһугар IV Николаевскай пуорум ыытылла турар

Николаевскай Форум номнуо төрдүс сылын ыччат уопут атастаһар, билиҥҥи кэмҥэ долгутар сытыы боппуруостары дьүүллэһэр, ырытар дьоһун былааһаккатын быһыытынан тэриллэр. Быйыл 400-кэ сайаапка киирбититтэн 100 тахса бастыҥ ыччат сүүмэрдэннэ.

Айтал Керемясов, СӨ ыччат парламенын салайааччы: «Ил Түмэн депутааттара да буоллуннар, былаас уорганнара да буолуннар кэлэннэр Уһук Илин уонна Арктика хайдах сайда турарын, хайдах ыччат күүс-көмө биэрэн сайыннарыахпытын сөп диэн ырытаһыахпыт».

СӨ бастакы Бэрэсидьиэнэ Михаил Николаев сырдык кэриэһигэр анаммыт тэрээһиҥҥэ кыттарга Саха сирин араас улуустарыттан бастыҥ ыччат сүүмэрдэнэн Форумҥа кыттар чиэскэ тигистэ. Маны тэҥэ быйыл тэрэһиҥҥэ дойду регионнарыттан ол курдук Москваттан, Сахалинтан, Карелияттан, Магадантан ыалдьыттар  кэллилэр. Кинилэр ортолоругар исписэлиистэр, олох-дьаһах араас хайысхатыгар үлэлии-хамныы сылдьар эрчимнээх эдэр дьон бааллар.

Ксения Иванова, Москва куорат ыччакка парламенын бэрэссэдээтэлин солбуйааччы: «Мы откликнулись на приглашение, приехали. Цели, поставленные на этот форум, это, конечно же, партнерство, найти полезные знакомства и в дальнейшем сотрудничать с молодежным парламентом».

Форум үөрүүлээх аһыллыытыгар Бырабыыталыстыбаттан, Ил Түмэн, Хаҥалас улууһун салалтата кытыннылар. 3 күн устата Форум кыттыылаахтара араас хайысхаларынан үлэлиэхтэрэ. Быйылгы тэрээһин Арассыыйа норуоттарын сомоҕолоһуутун бөҕөргөтөр,  чуолаан Уһук Илин, уонна Арктика регионнарын сайыннарар хайысхалаах буолла. 

Афанасий Владимиров, Ил Түмэн бэрэссэдээтэлин солбуйааччы: «Төрдүс пуорум таһыма лаппа таҕыста. Федеральнай таһымҥа үп-харчы көрүлүннэ. 4 тахса курдук ыччаттар бэйэлэрин этиилэрин, бырайыактарын көмүскүүллэр уонна көмө ылыахтарын сөп».

Форум кыттыылаахтара кадр, инновация, оҥоһук өй, грант, промышленность, экономика, бизнес хайысхаларынан санааларын үллэһиннилэр, экспердэр сүбэлэрин иһиттилэр.

Айыы Куо Троева, Тойон Мүрүтээҕи уолаттар гимназияларын дириэктэрин сүбэһитэ: «Билсиһиини күүтэбин. Манна эдэрдэр түмсэммит Өрөспүүбүлүкэбит сайдарыгар биир кылаат киллэрэммит үлэлиирбит. Бэйэм бырайыактаах кэлбитим “Кынат” диэн».

Форум түмүгүнэн хайысхаларынан бастыҥ бырайыктаахтар граанынан наҕаараадаланыахтара. Кинилэр граан үбүнэн көмүскээбит бырайыактарын олоххо киллэрэр кыахтаналлар.