Дьокуускайга тыа хаһаайыстыбатын аһын-үөлүн дьаарбанката ыытыллынна

Сунтаартан айаннаан кэлбит Надежда Петрова үрүҥ ас арааһын дьаарбаҥкаҕа аҕалла. Кини 200 киилэ арыыны атыылыыр соруктаах. Онуоха ылыан баҕалаах дьон баһаам буолан биэрдэ. Быйыл Сунтаар улууһун хаһаайыстыбалара үүккэ былааннарын куоһарар санаалаахтар. Күн бүгүн 70 бырыһыанын ыан туттардылар. 

Надежда Петров, "Үрдэл" хаһаайыстыба үлэһитэ: «Арыы таһынан тэрилтэбит 13 араас аһы оҥорон таһаарар».

Быйылгы дьаарбаҥкаҕа 20-тэн тахса улуустан 80-ча хаһаайыстыба уонна 14 агросокуола кыттыыны ыллылар. Бу сыллааҕы атыы-эргиэҥҥэ эт ас элбэҕэ бэлиэтэннэ. Быһа холоон сыана сэттэ мөһөөх биэс уонтан тыһыынчаҕа диэри быһыллан турар. 

Сергей Местников, СӨ бырабыыталыстыбатын бэрэссэдээтэлин солбуйааччы: «Үүт-эт, балык, туорахтаах култуура, оҕуруот аһа, мүөт, араас оҥоһуктар биһирэбил ылалларын бэлиэтиибит».

Тыа сириттэн кэлбит сибиэһэй ас хаачыстыбатын киин куорат олохтоохторо, ыалдьыттара сыаналыыллар. Кэтэһиилээх аска-үөлгэ түөлбэ аайы уһун уочарат буолла.

Онтон Кэбээйи улууһун түөлбэтигэр сип сибиэһэй хамсыы сылдьар балыгы ылыахха сэп. Ол эрэн балыгынан дьарыгырар хаһаайыстыба үлэһиттэрэ этэллэринэн, сыл ахсын собо аччаатар аччаан иһэр.

Наталья Иннокентьева, балык хаһаайыстыбатын атыыһыта: «Собо киэнэ сыла аайы тутара мөлтөөн иһэр».

Бу сыллааҕы тыа хаһаайыстыбатын оҥорон таһаарар бородууксуйатын көрдөрүүтэ дьаарбаҥкаҕа кэлэн турбутуттан көстөр. Арай урукку дьыллартан оҕуруот аһа аҕыйах курдук. 

Ас-үөл сыаната былырыыҥҥыттан уларыйан турар. Ол да буоллар 3 күннээх дьаарбаҥкаҕа атыы-тутуу көхтөөхтүк барда.