Дьокуускайга аан бастакытын "Доруобуйа учуутала" диэн ааттаах күрэх буолла

Бүлүүтээҕи педагогическай колледж физкультураҕа салаатын преподавателэ Иннокентий Баснаев "Доруобуйа учуутала" күрэх кыттыылааҕа. Кини үөрэҕирии эйгэтигэр үлэлээбитэ 15 сылтан орто. Урукку кэмҥэ маннык таһымнаах күрэхтэргэ кыттыбыт уопуттаах. Иннокентий Иннокентьевич эт-хаан өттүнэн оҕону сайыннарыыга тустаах эйгэ тэриллиэн наада диэн санаалаах. Ол эбэтэр уруок эрэ кэмигэр буолабакка, күннээҕи олоххо дьарыктары дьүөрэлиир көдьүүстээҕин бэлиэтиир.

Иннокентий Баснаев, Бүлүүтээҕи педагогическай колледж преподавателэ: «Урок эрэ кэмигэр буолбакка, эбии спортивнай секциялар, тэрээһиннэр баар буолуохтаахтар».

Доруобуйа учуутала диэн куонкурус Арассыыйа үрдүнэн сыллата тэриллэр. Быйылгыттан Саха сиригэр туспа анаан-минээн күрэх тэрийэн, кыайыылааҕы талан кини кыттар чиэскэ тиксиэҕэ. Бу сайын күрэх кыттыылаахтара сүүмэрдээһини ааһан 5 учуутал талыллан финалга киирдэ. 

Елизавета Яковлева, СӨ үөрэҕи сайыннарар уонна идэ таһымын үрдэтэр институт старшай преподавателэ: «Чөл олоҕу тутуһуу, режимнээх буолуохтаахпыт диэн, успуортунан дьарыктаныахтаахпыт диэн, сөпкө аһыахтаахпыт диэн үөрүйэхтэри уроктарыгар, дьарыктарыгар оҕолорго хайдах иҥэрэр уонна ону көрдөрөр технологияларын көрдүбүт».

Онон оҕо оскуола саҕаттан доруобуйа култууратын иҥэринэ улаатарыгар үлэ барыаҕа. Манна хас биирдии предмет учуутала бэйэтин холобурунан, ньыматынан оҕолорго доруобуйа - бу киһи саамай күндү баайа, кинини харыстыырга, сайыннарыыга кыһаллыахтааҕын үөрэтэллэр. 

Марина Филипова, Чурапчытааҕы гимназия учуутала: «Доруобуйа диэн бэйэтэ наһаа дириҥ ис хоһоонноон. Аан маҥнайгы гректар этэллэринэн – чөл олох диэн эн төбөҕүттэн саҕаланыахтаах. Төбө онтон ис туругун, онтон эйгэн».

Үөрэнээччи доруобуйата - киин болҕомтоҕо. Үөрэҕирии үлэһиттэрин атырдьах ыйынааҕы мунньаҕар кэлэр дьылы үөрэнээччи доруобуйатыгар аныыры туһунан этии киллэрдилэр. Икки күн устата күрэх кыттыылаахтара бэйэлэрин көрүүлэрин, сатабылларын билиһиннэрдилэр.

Екатерина Попова, "Доруобуйа учуутала -2026" күрэх кыайыылааҕа: «Мин көрүҥүм – хабылык, хаамыска. Оҕолору илии нөҥүө доруобуйаларын тупсарар диэн бу икки күннээх күрэхтэргэ көрдөрдүм».

Түмүккэ экспердэр хамыыһыйаларын быһаарыытынан Мэҥэ-Хаҥалас улууһуттан сылдьар Екатерина Попова кыйыылааҕынан таҕыста. Кини сэтинньи ыйга Екатеринбург куоракка бүтүн дойдутааҕы күрэххэ кыттар чиэһи ылла.