"Анаабыр алмаастара" тэрилтэ алмааһы тэҥэ, көмүс хостооһунун ылсан дьарыктанан саҕалаата

Өлөөн улууһун Хаптаһыннаах диэн учаастага. Манна көмүс саппааһа булуллан, ааспыт сылтан учаастакка бытархай көмүһү хостооһуҥҥа үлэ тэтимнээхтик барар. Барыта 150 тахса үлэһит күннэри-түүннэри өрөбүлэ суох түбүгүрэр. Сүрүннээн манна уопуттаах, номнуо уонтан тахса сыл ыстаастаах уолаттар үлэлиилэр.

Василий Гермогенов, фабрика технолога: «Үлэбит чааһа 08:00 – 20:00. Усулуобуйа үчүгэй, барыта баар. Сибээс, интернет баар».

"Анаабыр алмаастара" тэрилтэ олохтоох ыччаты үлэ миэстэтинэн хааччыйыыга ылсан үлэлиир. Ол курдук манна рабочайынан киирбит уолаттар эбии үөрэнэн маастарга, технологка тиийэ үүнэллэр. Өлүөхүмэ улууһуттан сылдьар Сергей Спиридонов 14 сыл аннараа өттүгэр бастаан доводка сыаҕар үлэтин саҕалаабыта, билигин машинист дуоһунастаах.

Сергей Спиридонов, көмүһү сууйар техникэ үлэһитэ: «Эбээһинэспэр улахан таастары сууйан, конвейерынан ыытан. Сүрүнэ үчүгэйдик сууйуу буолар».

Көмүс хостооһунун курдук уустук үлэҕэ сылдьар үлэһиттэргэ олороллоругар табыгастаах усулуобуйа баар. Иккилии, устүү миэстэлээх толору хааччыллыылаах блоктарга олорон үлэлииллэр.

Владислав Егоров, наардааһын комплексын салайааччы: «Стиралка, холодильник, мойка для приготовления, стол, кухня. Основное это тут санузел-душевая».

Биллэн турар вахта үлэтигэр сүрүн болҕомтону ас-үөл боппуруоһа ылар. Манна повардар икки сменаҕа арахсан үлэһиттэри минньигэс, иҥэмтиэлээх, тотоойу аһынан хааччыйаллар.

Семён Москвитин, повар: «Икки сменанан үлэлиибит. Сарсыардааҥҥы аһылыгы түүн буһараллар, биһиги сарсыарда аһатан баран эбиэппитигэр бэлэмнэн киирэн барабыт. Полигоҥҥа термостарынан ас ыытабыт».

"Анаабыр алмаастара" тэрилтэ бары бириискэлэригэр үлэһиттэргэ аҥардас үлэ усулуобуйатын эрэ буолбакка, сынньанар, дьарыктанар эйгэни эмиэ тэрийэр.  

Виктор Шамаев- "Анаабыр алмаастара" тэрилтэ кылаабынай инженерэ: «Кэлэр сылга манна культурнай-спортивнай комплекс тутуохтаахпыт, баанньык баар буолуо, эрчиллэр саала, бильярд. Улахан уопсай тутаары сылдьабыт, тоҕо диэтэххэ эһиилгэттэн объеммут икки төгүл улаатыахтаах».

Быйылгы сууйар сезону былааннарын сүүстэн тахса бырыһыан аһара толорон ситиһиилээхтик түмүктээтилэр. Салгыы кэлэр үлэ сезонугар бэлэмнэнии күүтэр.