Дойду үрдүнэн аҕам саастаахтары көрүү-истии улахан болҕомтону ылар

Амма улууһуттан төрүттээх 74 саастаах Алексей Матвеев Капитоновкатааҕы кырдьаҕастар, инбэлииттэр дьиэлэригэр олоро киирбитэ иккис сыла. Алексей Николаевич манна бэйэтэ баҕа өттүнэн 2 сыл уочараттаан киирдим диэн кэпсиир. Үйэтин тухары эт кэмбинээтигэр үлэлээбит. Интэрнээккэ олорорго усулуобуйа үчүгэй диэн кэпсиир.

Алексей Матвеев, Капитоновкатааҕы кырдьаҕастар, инбэлииттэр интэринээт-дьиэлэрин олохтооҕо: «Манна олорорго усулуобуйа олус үчүгэй. Манна дьарыктанабын, онтон араас оонньуулары оонньуубут, онно дьоннору агитациялыы сатыыбын».

Капитоновкатааҕы кырдьаҕастар, инбэлииттэр интернат-дьиэтигэр 201 киһи олорор, олортон улахан аҥара инбэлиит дьон, 160-тан тахса үлэһит баар. Манна бэйэлэрин көрүнэр кыахтара суох буолбут, көрүүгэ-истиигэ, эмтэниигэ наадыйар эр дьон 60, дьахталлар 55 саастарыттан уонна бастакы, иккис группалаах инбэлииттэр киирэн, хосторго иккилии-үстүү буолан олороллор.

Анна Ткаченко, Капитоновкатааҕы кырдьаҕастар, инбэлииттэр интэринээт-дьиэлэрин старшай медсиэстэрэтэ: «Сытар дьоннор элбэхтэр. Профилактикалары ыытабыт быраас назначениятынан».

Анна Ткаченко кырдьаҕастар дьиэлэригэр медицинскэй сиэстэрэнэн 30-тан тахса сыл устата үлэлээн кэллэ. Үйэтин тухары кырдьаҕастары, ыарыһахтары көрөр-истэр уустук үлэҕэ сылдьар.

Анна Ткаченко, Капитоновкатааҕы кырдьаҕастар, инбэлииттэр интэринээт-дьиэлэрин старшай медсиэстэрэтэ: «Киһи барыта бэйэтэ характердаах, подход наада. Саҥа киирбит киһиэхэ адаптация наада, онно бары үлэлиибит».

Бастакы этээскэ эмтиир физкультура хоһо, массаас, стоматолог кэбиниэтэ, көрсүһэр хос, библиотека, аактабай саала бааллар. Баанньык баар, сууйар-өтүүктүүр кэмбинээт үлэлиир.

Василий Иванович Кононов аатын сүгэр дьиэ-интернат 1971 сыллаахха тэриллибитэ. Бу сыл Саха сиригэр бастакынан бу типовой дьиэ тутуллан үлэҕэ киирбитэ.

Алексей Шестаков, Капитоновкатааҕы кырдьаҕастар, инбэлииттэр интэринээт-дьиэлэрин дириэктэрэ: «Манна киириэхтэрин иннинэ сайабылыанньа биэрэллэр, ону комиссия көрөн Минтруда направлениятынан биһиэхэ киирэллэр».

Манна олохтоохторго араас культурнай, спортивнай тэрээһиннэри ыыталлар, тэрилтэлэри, балыыһалары кытта сөбүлэҥ түһэрсэн тэҥҥэ үлэлииллэр.