Күһүҥҥү дьаҥ ыарыытын көрдөрүүтэ үрдүүр

Балаҕан ыйыттан саҕалаан өрөспүүбүлүкэ үрдүнэн тымныйыынан ыалдьыы көрдөрүүтэ үрдүк. Ааспыт нэдиэлэ түмүгүнэн күһүҥҥү дьаҥ ыарыыта күннэтэ элбии турар. Дьокуускай олохтооҕо Мария Колесова ыалдьан олорор сиринэн балыыһаҕа бырааска кэлэн көрдөрүнэ сылдьар.

Мария Колесова, Дьокуускай олохтооҕо: «Бэҕэһээ эмискэ күөмэйим ыалдьыбыта, температурам 37 этэ. Бүгүн манна ыыттылар, туох эрэ вирус баар быһылаах».

Киров аатынан уулуссаҕа турар өрөспүүбүлүкэтээҕи үһүс нүөмэрдээх балыыһаҕа күннэтэ элбэх киһи ыалдьан кэлэр, сорох дьиэтигэр бырааһы ыҥыттарар. Сүрүннээн ОРВИ, грипп ыарыыта элбэх, коронавирус эмиэ биирдиилээн баар.

Савелий Неустроев, СӨ 3№-дээх клиническэй балыыһатын фельдшера: «Күҥҥэ элбэх киһи кэлэр – 30-35 курдук. Симптомнара: сөтөл, үрдүк температура, насморк, недомогание, ломота. Кырдьаҕастар да, эдэрдэр да бары кэлэллэр».

Биир үксүн 14 диэри саастаах оҕолор ыалдьаллар, орто саастаахтар, кырдьаҕастар ыалдьыылара эмиэ элбэх.  Исписэлиистэр бэлиэтииллэринэн, ОРВИ, грипп ыарыыттан харыстаныыга саамай көдьүүстээҕинэн быһыы ылыы буолар. Ааспыт нэдиэлэ ортотуттан саҕалаан Саха сиригэр кэлиэхтээх вакцина аҥара кэлэн турар. Куорат балыыһаларынан тарҕаммыт эбит буоллаҕына, улуустарга бу нэдиэлэҕэ тиксэриэхтэрэ.

Валентина Григорьева, СӨ Роспотребнадзор салаатын эпидемиологическай кэтээн көрүүгэ салаатын салайааччытын солбуйааччы: «Быйылгы сезоҥҥа федеральнай бырагырааманан 409340 доза грипп утары вакцина кэлиэхтээх. Бу ахсаантан 58,8% ааспыт нэдиэлэҕэ кэлбитэ. Куорат поликлиникалара бары ылбыттара, оройуоннарга бу нэдиэлэннэн тарҕаныаҕа».

Маныаха быйыл кэлбит вакцина састааба барыта саҥардыллыбыт. Ол курдук грипп хас да көрүҥүттэн харыстыыр саҥардыллыбыт штамнартан турар. Быһыыны туруоруу эрээһиннээхтик уһуйааннарынан, оскуолаларынан, тэрилтэлэринэн ыытыллыаҕа. Ким баҕалаах бэйэтин поликлиникатыгар кэлэн туруортарыан сөп.

Айталина Быканова, СӨ 3№-дээх клиническэй балыыһатын терапияҕа салаатын сэбиэдиссэйэ: «Флю-М диэн вакцинаны биһиги бастатан туран аҕам саастаах дьоннорго, эмп үөрэх үлэһиттэригэр, устудьуоннарга уонна Ультрикс-Квадри диэни оҕолорго туруорабыт. Былаан быһыытынан нэһилиэк 60% грипп утары вакцианцияҕа хабыллыахтаах».

Биллэрин курдук, ыарыыны сэрэппит ордук, онон харыстаныы миэрэлэрин тутуһарга, элбэх дьон мустар сиригэр сылдьартан туттунарга, быһыыны ыларга сүбэлиллэр.