Хоту уонна Арктика улуустарыгар социальнай суолталаах бородуукталары таһыы үлэтэ салҕанар

Сип-сибиэһэй хортуоппуй, хаппыыста онтон да атын көрүҥ оҕуруот аһа өрөһөлөнөн сытар. Онтон бу Арктикатааҕы тыраанспар уонна тиэйии хампаанньатын  ыскылаатыгар үлэ күргүөмнээҕэ ыытылла турара көстөр. Хомуур үлэтэ үмүрүйэр түһүмэҕин кытары тэҥҥэ Хоту уонна Арктика улуустарыгар күһүҥҥү сибиэһэй оҕуруот аһа тиийэ охсуохтаах.

Быйыл ити эҥээр тиийэхтээх оҕуруот аһыгар былаан 350 туонна, онтон 220 туонната хортуоппуй буолар. Улахан төһүү күүс бэйэбит оҥорон таһаараччыларбыт, хаһаайыстыларбыт буоллаллар диэн, норуокка биллэринии "Пятитысячник - Пятак" ыскылаат сэбиэдиссэйэ Галина Румянцева иһитиннэрэр.

Галина Румянцева, ыскылаат сэбиэдиссэйэ: «Оҕуруот аһын олохтоох хаһаайыстыбалартан ылабыт. Күн-бүгүҥҥэ дылы аҕала тураллар. Саас дуогабар түһэрсэн былааннарын толоро сылдьаллар».

Хоту улуустарга сайын устата таһаҕас ыытыыла турда. Быйыл холобура, Удачнай куоратынан Өлөөннөргө вездеходтарынан 10 туонна саамай наадаалаах ас-үөл, бородуукта тиийдэ. Бу олус үтүө холобур,  маныаха экономичнай диэн тустаах тэрилтэ саҥа уопутун кэпсээтэ. Онтон билигин сүрүн таһаҕас уунан ыытылла турар, быйылгы былаан 1,5 тыһ туонна.

Иннокентий Петров, "АТЛХ" тэрилтэ салайааччытын бастакы солбуйааччыта: «Навигация үлэтэ бара турар. Бүгүҥҥү күҥҥэ 915 туонна баран турар. Бу нэдиэлэҕэ икки хайысханан үлэлии сылдьабыт».

Манна даҕатан эттэххэ, балаҕан ыйын устата, уу суола сабыллыар диэри улахан кыамталаах уу ааллара: Беломорскай-11 Чокурдаах Үрүҥ-Хайа - Колымскай - Орто Халыма хайысханан 160 туоннаны, Орлов хаппытаан суудууна Усуйаана - Черскай - Зырянка хайысханан 206 туонна таһаҕаһы илдьиэхтээхтэр.