Саҥа үөрэх дьыла саҕаланан оскуола үөрэнээччилэригэр түбүктээх кэм үүннэ

Бу ИТ-куб цифровой үөрэхтээһин киинигэр социальнай сакааһынан арыллыбыт бөлөх оҕолорун дьарыктара номнуо саҕаланна. Дьокуускайдааҕы 31 №-дээх оскуола 5 кылааһын үөрэнээччилэрэ бырагырааманы  таҥыы үөрүйэхтэригар уһуйуллаллар. Эрэл Егоров  аан бастакытын саҥа технологияны баһылыырга холонор.

Эрэл Егоров, Дьокуускайдааҕы 31№-дээх орто оскуола үөрэнээччитэ: «Программист буоларга үөрэнэбин. Туһалаах, наада буолуо».

Цифровой технология хайысхата балысханнык сайдан олохпут бары араҥатын хабар. Онон ИТ-технологияҕа оҕо кыратыттан сыстан улааттаҕына идэ таларыгар көмөлөөх буолар. ИТ-куб цифровой үөрэхтээһин киинэ арыллыбыта номнуо 6 сылыгар барда. Манна 50-тан тахса үөрэх бырагыраамаларынан оҕолору дьарыктыыллар. 

Айсен Новгородов, киин эбии үөрэхтээһиҥҥэ старшай педагога: «Мин бырагыраамам “Основа алгоритмики и логики” буолар, ону таһынан оонньуу оҥорор бырагыраама баар».

Манна дьарыктанар оҕолор цифровой технологиялары, ол курдук роботтартан саҕалаан, мобильнай сыһыарыылары, оонньуулары, оҥоһук өй, графическай дизайн, онтон да атын хайысхаларынан үөрэнэллэр. А4ардас теорияны эрэ буолбакка, дьиҥнээх бырайыактары оҥорор, ИТ-сфера үөрүйэхтэрин баһылыыр кыахтаналлар. 

Татьяна Попова, киин эбии үөрэхтээһиҥҥэ старшай педагога: «Билиҥҥи турукка 1891 оҕо суруттарда. Хас биир педагог 3-4 бырагыраамалаах. 7-18 саастаахтары ылабыт».

Кииҥҥэ куруһуоктарга суруттарыы атырдьах ыйын 26 күнүттэн салҕанар. Суруттарыы "Госуслуги" порталын нөҥүө ыытыллар, онно сайаапканы толорон ыыттахха киинтэн эрийэллэр. Билигин хомуур үгүс хайысханан туолбут, ол эрэн сорох бырагыраамаларынан миэстэлэр баалар. Мария Кычкина оҕото саҥа бастакы кылааска үөрэнэ киирбит, кииҥҥэ эбии дьарыкка роботехникаҕа суруттарбыт.

Мария Кычкина, төрөппүт: «Туһалаах бөҕө буоллаҕа, босхо. Миэстэҕэ тигистибит».

Бары хайысхаларынан дьарыктар алтынньы саҥатыттан саҕаланыахтара. Онон хаалбыт миэстэлэргэ оҕоҕут инникитигэр бэрт наадалаах үөрэххэ суруттарарга тиэтэйин диэн ыҥыраллар.