"Көмүскэлгэ уонна үлэҕэ бэлэм буол" күһүҥҥү бэстибээлэ элбэх киһини түмтэ

Күүс-күдэх эрчимэр талаһар 17 саастаах Каролина Слепцова "Үлэҕэ уонна көмүскэниигэ бэлэм буолуу" нормативтарын ситиһиилээхтик туттара сылдьар. Кини оҕо эрдэҕиттэн успуорка сыстыгас, чэпчэки атлетиканан утумнаахтык дьарыктаммыт. Онон спорт кини олоҕун арахсыспат доҕоро буолар.

Каролина Слепцова, ГТО нуорматын туттарыы кыттыылааҕа: «Кыра эрдэхпиттэн успуортунан дьарыктанабын. Төрөппүттэрим бэйэлэрэ тренердэр. Барыта көмүс, ытыы уонна 60 миэтэрэ хаалла».

ГТО нормативтарын туттарыы хас даҕаны көрүҥҥэ арахсар. Бу күһүҥҥү бэстибээл буола турар. 2024 сыллаахтан ГТОну туттарыы сылга 3 араас сезоҥҥа тэриллэр. Марианна, Афанасий Афанасьевтар спорт фанааттара, бэйэлэрэ волейболунан үлүһүйэллэр. Аан бастакытын ГТО нуорматын туттарыыга холонорго санаммыттар. 

Марианна, Афанасий Афанасьевтар, ГТО нуорматын туттарыы кыттыылаахтара: «Оҕолорбут эккиэн көмүс значоктаахтар. Ол иһин бэйэбит холунан көрүөххэ диэн буолла. Этэҥҥэ туттардыбыт. Пресс хачайдаатыбыт».

Манна ким баҕалаах кэлэн бэйэтин күүһүн, кыаҕын тургутуон сөп. Тардыныы, отжимание, гиирэни көтөҕүү, ыстаныы, араас дистанцияҕа сүүрүү, электроннай ытыы көрүҥнэрэ бааллар.

Софияна Охлопкова, ГТО нуорматын туттарыы кыттыылааҕа: «Барытыттан тутулуктаах, сүрүнэ иһинээҕи туочукалары холбоон ытыахтааххын, оччоҕуна үчүгэй балл ылаҕын».

Тэрээһин бүтүн 3 күн устата салаллар. 2 күн бу Юность стадиоҥҥа уонна сынньалаҥ Пааркатыгар. Бастакы күн сүрүннээн эдэр эрчимнээх дьон элбэх. 

Ариян Александров, ГТО нуорматын туттарыы Саха сиринээҕи киинин салайааччыта: «Сарсыарда 11 чаастан 4000 кыттааччы буолла».

Бастыҥ түмүктээхтэр ГТО кыһыл, үрүҥ көмүс, боруонса бэлиэлэрин тутуохтара. Сыллата кыттааччы ахсаана элбиир. Аҥардас ааспыт сылга уопсайа 13 тыһыынчаттан тахса киһи күүһүн-кыаҕын тургутта. Улуустарга бу сылларга барыта ГТОну туттарарга 37 дьоҕус былассакка тэриллибитэ. Быйыл эбии 9 былассаакка оҥоһуллара күүтүллэр.