Амма улууһугар саҥа комбайн үлэтин саҕалаата

Бу курдук саҥа комбайн үлэтин саҕалаан, номнуо, эбии аһылык бэлэмигэр тахсан сиилэскэ үүннэриллибит эбиэһи быһа сылдьар.

Маннык комбайн улууска иккис буолар. Тыа хаһаайыстыбатын министиэристибэтин анал быраграматынан ылыллыбыт, уопсай сыаната 10 мөлүйүөн солкуобайга тэҥнэһэр. Саҥа сиилэстиир комбайн кыамтата улахан, эбии аһылыгы бэлэмнээһиҥҥэ улахан көмөлөөх буолуоҕа.

Ион Кононов, Амма улууһун тыа хаһаайыстыбатын салалтатын салайааччыта: «Тыа хаһаайыстыбатын министриэристибэтэ үчүгэй баҕайы бырагыраама оҥорбут. Биһиги сиэмэ ылыытыгар, күрүө тутуутугар, быраҕыллыбыт бааһыналары чөлүгэр түһэриигэ уонна сүрүнэ тиэхиньикэ ылыытыгар анаммыт бырагыраама. Онус сылын үлэлээн, быйыл манна улуустан 70 тахса мөл., нэһилиэктэртэн 70 уонна министиэристибэттэн сүүстэн тахса мөл. көрүллэн бу үлэ барда».

Бу иннинэ, үлэһиттэр сиилэстиир комбайны Абаҕа хаһаайыстыбатыттан уларсар этилэр. Үлэни кэмигэр бүтэрэллэригэр куруук харгыстары көрсөллөрө. Онтон, билигин Бөтүҥ хаһаайыстыбата бэйэтэ тиэхиньикэлэнэн, үлэһиттэргэ усулуобуйа тэриллэн, үүнүүнү кэмигэр хомуйар буолбуттарыттан үөрүүлэрэ улахан.

Күнү-дьылы баттаһа хас биирди хаһаайыстыба тохтообокко үлэлиир. Улуус биир тутаах, улахан хаһаайыстыбата Фоминнар 65 гектар сиргэ хортуоска, 100 гектарга эбиэс ыспыттар, итиэннэ 80-тан тахса гектарга бурдугу. Хаһаайыстыба олордор сиэмэтин барытын Амма сопхуоһуттан ылан олорор. Онон, быйыл да өлгөм үүнүүнү ылар былааннаах.

Константин Фомин, Сэргэ Бэс нэһилиэгин бааһынай хаһаайыстыбатын салайааччыта: «Өссө кыратык ардаабыта буоллар өссө үчүгэй буолуо этэ. Оппут былаана 350 туонна, билигин 280 курдук оҥордубут. Бэйэбит сирбит бүттэ, хаалбыт сирдэргэ тахсыахтаахпыт».

Улууска оттооһун хампаанньата күүстээхтик барар. Хас биирдии нэһилиэк былаанын толорооруу тохтообокко үлэлиир. Күн бүгүн 20-чэ тыһыынча от оттонно. Бу Өрөспүүбүлүкэ тиэрдибит 31 тыһыынча туонна былааныттан 60-тан тахса быраһыана туолла.

Степан Кузьмин, Амма улууһун баһылыга: «Бэс ыйыгар курааннаан, Бөтүҥ нэһилилэгиттэн үөһээ сытар нэһилиэктэр бары курааннаатылар. Бу 60 тахса км сиргэ оттуурга 23 мобильнай биригээдэ тэриллэн саҕалаата. Уонна биһиги сиилэскэ күн-бүгүн 70% былааммытын толорон олоробут, сенажка эмиэ оннук курдук».

Аммалар, аны балаҕан ыйын бастакы күнүттэн бурдук хомууругар тахсыахтара. Амма улууһа, быйыл 4,5 тыһыынча гектар сиргэ бурдук ыһан олорор. Сайын кураан туран үүнүү орто, ол эрэн былааны толорор сорук турар.