Суолга саахал тахсара уҕараабат

Бу каадырдарга Покровскай аартык 15 км буолбут суол саахала көстөр. 54 саастаах суоппар "Сузуки Гранд Витара" мааркалаах тимир көлөнү ыытан иһэн, сөптөөх түргэни тутуспакка суолтан көппүт. Уруулга олорооччу эчэйии ылан балыыһаҕа киирибит. Бу саахалы кытары киин куоракка бу өрөбүлгэ сокуоннай сааһын ситэ илик оҕо кыттыылаах оһол тахсыбыт.

Иванна Петрова, Дьокуускайдааҕы суолга куттал суох буолуутун хааччыйар иниспиэксийэ судаарыстыбыннай иниспиэктэрэ: «Ол курдук атырдьах ыйын 15 күнүгэр киэһээ 20:00 чаас саҕана Губина уулуссатын 11 №-дээх дьиэтин таһыгар 41 саастаах "Тойота Ярис" тимир көлө суоппара сокуоннай сааһын ситэ илик сатыы сылдьар оҕону түннэри көппүтэ бэлиэтэммит. Бу быһылаан түмүгэр оҕо эчэйии ылбыт».

Улуустарга эмиэ суол саахала тасха турар. Алдан улууһугар суоппар киһи өлүүлээх быһылаан таҕыста. 1980 сыллаах эр киһи "Ниссан Сафари" маарка көлөнөн айаннаан иһэн, көҥүллэммэтэх сиринэн массыынаны ситээри, хомойуох иһин тыына быһынна. Бу курдук саахаллар ааспыт нэдиэлэҕэ уонна өрөбүллэргэ 40-тан тахса таҕыстылар. 

Филипп Тырылгин, СӨ суол сулууспатын пропагандаҕа иниспиэктэрэ: «Өрөспүүбүлүкэ үрдүнэн барыта 41 массыына саахала тахсыбыт. 7 киһи эчэйиини ылла, 2 киһи тыына быһынна. Ол түмүгэр 778 административнай дьыла оҥоһулунна, 23 итирик туруктаах суоппар тутулунна, 5 итирик суоппар         иккистээн түбэстэ. Бу түбэлтэҕэ уголовнай эппиэтинэһи кинилэр сүгэллэр. 36 киһи бырааба суох уруулга олорооччу, 20 оҕолору таһыы быраабылатын тутуспатах суоппардар түбэстилэр».

Бу курдук үгүс элбэх кэһиини кытары оҕо кыттыылаах суол саахала уҕараабат. Ол курдук, сыл саҕаланыаҕыттан 80 сокуоннай сааһын ситэ илик оҕолордоох  быһылааннар таҕыстылар. Тустаах биэдэмистибэ суоппардары болҕомтолоох буоларга ыҥырар.

Иванна Петрова, Дьокуускайдааҕы суолга куттал суох буолуутун хааччыйар иниспиэксийэ судаарыстыбыннай иниспиэктэрэ: «Суоппардарга болҕомтолоох буолун диэн санатабыт. Суолга куттал үөскэтэр маневрдары оҥоруман, тимир көлө икки ардынааҕы дистанцияны тутуһун. Суол сатыы сылдьааччыларыгар болҕомтолоох буолун диэн ыҥырабыт».

Сотору кэминэн үөрэх кэмэ саҕалыныа. Аартыктарга оҕо ахсаана эбиллэр кэмигэр ГАИ иниспиэктэрдэрэ күүһүрдүллүбүт эрэһииминэн үлэлээн саҕалыахтара. Үөрэх кыһаларыгар, суол быһа охсуһууларыгар болҕомтону ууруохтара.