“Авиалесоохрана” десантниктара үөрүйэхтэрин чочуйаллар

Уолаттар омуннаабакка эттэххэ, күн бэҕэһээ Кэбээйи улууһугар баһаары умаллара сылдьыбыттара. Бүгүн номнуо Горнай оройуонугар үөһэттэн парашютунан ыстаныы үөрэтиитигэр сылдьаллар. Онтон бу сайыҥҥы дьарыктар   десантник уолаттарбыт үөрүйэхтэрин чочуйалларыгар туһуланар, үөһэттэн ыстаныыларын умнубаттарыгар ананар.

"Авиалесоохрана"  Дьокуускайдааҕы салаатын парашютист-десантнига Саян Васильев уолаттарын кытары бу сайын устата өрөспүүбүлүкэни биир гына ойуур баһаардарын умулларыыга сырытта. Ыксаллаах быһыы-майгы кэмигэр уот күүдэпчилэнэ турар сирдэрин диэки парашютунан ойорго үчүгэй бэлэм наада, быраабыланы тутуһуу инники күөҥҥэ диэн тоһоҕолоон этэр.

Саян Васильев, баһаарынай инструктор: "Түһэргэ үчүгэйдик тэбиниэххэ наада. Уонна түһэн иһэн хараххын симимиэххин наада. Түһээт да парашюттарбытын сааһылыы охсуохтаахпыт"

Бүгүҥҥү үөһэттэн ыстанар дьарыкка уопсайа 18 үлэһит кыттыыны ылла. Уоту туруулаһар байыастарбыт АН-2 көтөр аалынан 1000 миэтэрэ үрдүктэн бүгүн ыстанныллар. Бу иннинэ атын салаа үлэһиттэрэ эмиэ үөрэтиилэри ааспыттара.

Егор Николаев, баһаарынай инструктор: "Бу күннэргэ Үөһээ Бүлүүгэ, Бүлүүгэ, Тааттаҕа, Бэрдьигэстээххэ ыстаннылар. Бу ый ыстаммакка сылдьар буоллахтарына, маннык дьарыктар буолаллар".

Бу үөрэтии улахан хамаанда үлэтэ буолар. Аллараа сиргэ, бастатан туран, десантниктар парашюттарын туох да сыыһата, ирдэбили барытын толорон хомуйохтаахтар. Ону барытын инструктордар кэтииллэр-маныыллар. Салгыы үөһэ көтүү саҕаланар.

Андрей Евдокимов, авиационнай бөлөх хамандыыра: "Түһэр сири быһаарарга бастаан лиэнтэ быраҕабыт. Манан биһиги парашютистары ханнык чопчу сиртэн түһэрэрбитин көрөбүт. Кэтээн көрөөччү лүөччүк хайаан да сиргэ баар дьону кытта сибээс тутуохтаах уонна хас биирдии түһээччини кэтиэхтээх".

Онтон манна даҕатан эттэххэ, Дьокуускай уокуругун эҥээр баһаар ураты эрэһиимэ тохтотулунна. Ол эрэн олохтоохтору тыаҕа сэрэхтээхтик  сылдьарга ыҥыраллар. Онтон "Авиалесоохрана", ойуур хаһаайыстыбатын исписэлиистэрин үлэтэ тохтообот. Билигин өрөспүүбүлүкэ үрдүнэн 60-тан тахса баһаар баара бэлиэтэнэр. Улахан болҕомто Өлөөн улууһугар ууруллар.