Үөһээ Бүлүү улууһун киинигэр эдэр ыаллар кыбаарталлара тутуллар

Элбэх оҕолоох дьиэ кэрэгэҥҥэ болҕомто. Үөһээ Бүлүү улууһун киинигэр эдэр ыаллар кыбаарталлара тутуллан үлэ күөстүү оргуйар. Күн бүгүн манна 70 дьиэ кэргэҥҥэ учаастак бэриллэн турар. Уот ситимэ, күөх төлөн ситимэ тардылан, билигин уулуссалары кытары ситимниир үлэ саҕаланна.

Олохтоох дьаһалта үлэһиттэрэ көҕүлээн манна түҥ тыаны солоон, аартыгы астардылар. Субуотунньук бөҕө оҥоһуллан, сир тэҥнэнэн, ити кэмнэргэ хас да улахан кыамталаах тимир көлөнөн кумах куттарыы үлэлэрэ ыытыллыбыттара. 

Николай Тумусов, “Үөһээ Бүлүү нэһилиэгэ” МТ дьаһалтатын ОДьКХ-ҕа, тутууга уонна нэһилиэги тупсарыыга кылаабынай исписэлииһэ: «Ыалларга түҥэтиллибит учаастактарга кэлэн турабыт. Быйылгаттан бэйэбит күүспүтүнэн суолу оҥорон саҕалаатыбыт. Дьоннор дьиэ туттан саҕалаатылар. Бу гаас ситимин бу сайын эмиэ саҕалыахтаахтар».

Билигин суол оҥоһулунна да, дьиэлэр туттуллан киирэн барыахтара. Оччотугар үгүс элбэх Үөһээ Бүлүү нэһилиэгин элбэх оҕолоох ыала саҥа дьиэлэргэ кииритэлээн барыахтара. Бу курдук тустаах бөһүөлэк үүнэр-сайдар. Маныаха өссө биир улахан суолталаах, Дойду таһымнаах уларыйыы Үөһээ Бүлүүгэ буолла. Ол курдук, нэһилиэк  иэнэ 5 бүк улаатта.

Татьяна Кугунурова, "Үөһээ Бүлүү нэһилиэгэ" МТ дьаһалтатын сир инженерэ: «Үөһээ Бүлүүбүт 968 га этэ. Кэҥээһин кэнниттэн 5520 га буолбута. Бу олус суолталаах кэҥээһин. Кэлин манна микрорайоннар баар буолуохтара».

Нэһилиэк иэнин улаатааһына диэн бөһүөлэк социальнай-экономическай сайдыытыгар улахан суолталаах буолар. Онтон бу барыта ымпыктаах үлэ түмүгүттэн таҕыста диэн нэһилиэк аҕа баһылыга иһитиннэрдэ.

Максим Силигиянов, "Үөһээ Бүлүү нэһилиэгэ" МТ баһылыга: «Улахан историческай событие буолбута. Бу 8 сылы быһа баһылыктыахпыттан кыраныысса кэҥэтээһинэ буолбута. 5 төгүл улаатта».

Онтон бу хас эмэ сыллаах үлэ түмүгэ буолар. Бу чэрчитинэн быйыл нэһилэк саҥа маастар-былаана оҥоһуллан түмүктэннэ. Онон тэнийии-сайдыы үлэтэ бу хайысхаҕа ыытыллан, атын нэһилиэктэрэгэ үтүө холобур эрэ буолар.