Дьокуускайга "Северный рубеж" диэн форум буолан ааста

Форум кыттыылаахтарын биир санаа түмэр - дойду туһугар, кыайыы туһугар. Манна анал байыаннай дьайыы кыттыылаахтара, волонтердар итиэннэ ыччат түмсэн санаа атастаһаллар. Тэрээһин сүрүн ыалдьыта аатырбыт сербскэй доброволец Деян Берич. Кини тула ыччат тоҕуоруһа мустар. Төрөөбүт дойдутуна буолбакка өйүнэн-санаатынан Арассыыйаҕа бэриниилээх байыаһы сэҥээрэн истэллэр.

Уххан Андреев, "Бастыҥнар хамсааһыннара" уопсастыбаннай хамсааһын исписэлииһэ: «Бу пуорумҥа биһи дьоруойдарбытын, Аҕа дойдубутун көмүскүүр дьоннору билэр көрөр, атах тэпсэн олорон кэпсэтэр кэмэ. Киһи быһыытынан хайдах дьон эбитий, киһи хайдах буолуохтааҕый диэн өйдөбүлү бигэргэтэр гына кэллибит».

Ыччаты кытта аһаҕастык кэпсэтии. Деян Берич бу билигин олоҕун сыала. Бастаан волонтер быһыытынан саҕалаан баран билигин дойду Президенын хамаандатыгар киирэн күүстээх үлэни ыытар. 

Деян Берич, анал байыаннай дьайыы кыттыылааҕа, снайпер: «Надо ездить по регионам как амбассадор Команды Путина, разговаривать с молодежью, с волонтерами, с участниками СВО, силовиками. Получается хорошо».

Форум биир сүрүн хайысхата волонтердар. Бу амарах санаалаах дьон анал байыаннай дьайыы саҕаланыаҕыттан биир күн тохтоло суох үлэлииллэр. Онон тыыл суолтата үрдүк. Тэрээһиҥҥэ байыастар волонтердары көрсөн махтаналлар, араас сүбэлэри биэрэллэр.

Леонид Смирников, анал байыаннай дьайыы кыттыылааҕа: «Спецоперацияҕа волонтер көмөтө баар буолан сэрии үчүгэйдик баран иһэр, кинилэр суохтар эбитэ буоллар ыарахан буолуо этэ».

Ол курдук анал байыаннай эпэрээссийэҕэ 4 сыл устата 200 туонна кэриҥэ волонтердар тикпит таҥастара барда. Итини сэргэ 6000 тахса аадырыстаах баһыылка. Бу үлүгэрдээх улахан кээмэйи амарах сүрэхтээх дьон тэрийэр. Боевые шелкопряды хамсааһын сүрүннээн хаххалыыр сиэккэни оҥоруунан дьарыктанар.

Тамара Попова, "Боевые шелкопряды Якутии" уопсастыбаннай хамсааһын салайааччыта: «Спецоперацияҕа саамай туһалаах маскировочнай сиэккэ буолар. Ол иһин күн-түүн сайаапка киирэ турар. Саллааттарбыт ыллахтарына наһаа үөрэллэр».

Форум биир чаҕылхай түгэнинэн буолла УАЗ мааркалаах массыынаны анал байыаннай дьайыыга туттарыы. Күлүүһү тэрээһин ыалдьыта Деян Берич тутта. Дьоруой өрөспүүбүлүкэ тэрилтэлэрэ көлөнү биэриигэ көхтөөхтүк кытталларын хайҕаата. Күн бүгүн уопсайа 50 тахса массыына "Норуот фронун" нөҥүө барда.