Бэйэ бородууксуйатын элбэтии

Улуустартан кэлэн буойунаҕа астаммыт сүөһү этин үлэһиттэр сатабыллаахтык туттан хаптан астыыллар.

Бу сыахха  сүөһү этин эрбииллэр, иһин туспа наардыыллар. Хатас сэлиэнньэтигэр  былырыыҥҥаттан үлэлиир куорат эркин соҕотох буойуна биир сменэҕэ 10-ча сүөһүнү астыыр. Уруккута сибиинньэ ферматын дьиэтин саҥатытан билигин үлэ кыаҕын ылбыт.  Буойуна хас да астыыр саалалаах, тоҥорор, тымнытар анал ыскылааттаах.

Спартак Петров, "Улуус" кээпэрэтиип чилиэнэ: «Мощноһа 18 төбө диэн, а так билигин ноҕуруускаламакка 7-8 төбөнү өлөрө турабыт. Бырайыагынан оҥоһуллубут буолан линияттан туораан кэлэн баран манна сойор, хаана сүүрэр онтон ити холодильникка киирэн хаалар. Онно 20 да күн туруон сөп. Биир температураҕа 0-4 кыраадыска».

Эккэ саҥа регламенынан,  тыа хаһаайыстыбатын министиэристибэтин дьаһалынан билигин  хаһаайыстыбалаахтар эттэрин атыыга ыыталларыгар тэлгэһэҕэ сүөһүнү өлөрөллөрө көҥүллэммэт. Хайаатар да аналлаах сиргэ-буойунаҕа илдьиэхтээхтэр.

Григорий Рубин, тыа хаһаайыстыбатын министиэристибэтин иһинэн ас-үөл технологиятын киинин инженер-технолога: «Саха сиригэр 100-кэ убойнай пункт, былаһаакка баар, ол иһинэн таба киэнэ. Эккитин переработкалыаххытын, атыылыаххытын баҕарар буоллаххытына "Меркурий" электроннай платформа нөҥүө ааһар».

Улуустан - улууска. Буойунаҕа астаммыт эт тута сыахха тиийэн бородууксуйа буолан тахсар. Өрөспүүбүлүкэ чугас  улуустарыттан кэлбит  сүөһү этиттэн  "Улуус" эт кэмбинээтэ  ас арааһын оҥорон таһаарар. Аныгы оборудованияҕа эт эриллэн тахсан, араас полуфабрикат оҥоһуллар, эт бородууксуйата тахсар.

Альберт Стрекаловскай, "Улуус" СХППК бэрэссэдээтэлэ: «ГОСТунан халбаһыылары 25 көрүҥү таһаарабыт, убаһаттан, табаттан, ынахтан, сибиинньэ этиттэн эмиэ 24-23 стабильно деликатес оҥорон таһаарабыт, полуфабрикаты эмиэ оҥоробут».

Ил Дархан бэлиэтээбитинэн, тыа хаһаайыстыбатын үлэтин сүрүн соруга бэйэни олохтоох бородууксуйанан хааччыйыы. 2030 сылга диэри бэйэ аһын-үөлүн балтараа төгүл элбэтэр сорук турар. Онон маннык буойуналар, эт кэмбинээтэ инникилээх соругу толорууга төһүү суолталаахтар.