Бастакы Президеммыт Михаил Ефимович Николаев олохтон барбыта 3 сыла

Бар дьон, саха норуотун бүттүүнүн дириҥ ытыктабылын, тапталын, сүгүрүйүүтүн ылбыт бастакы Президеммит Михаил Ефимович Николаев суох буолбута 3 сылыгар уопсастыбаннай миитин. Манна кини кэргэнэ Дора Никитична, оҕолоро, сиэннэрэ, хос сиэннэр, чугас дьоно уонна өрөспүүбүлүкэ уопсастыбаннаһа кыттыыны ылар.

Михаил Николаев уларыта тутуу дьалхааннаах кэмигэр саха норуотун дьылҕатын бэйэтин тус эппиэтинэһигэр ылбыт, инникини өтө көрөр дириҥ быһаарыылары, саҕалааһыннары олоххо киллэрбит, олохпут-дьаһахпыт бары араҥатыгар сайдыы акылаатын уурбут киһинэн буолар.

Климент Иванов, СӨ бочуоттаах гражданина, судаарыстыбаннай сулууспа бэтэрээнэ: «Михаил Ефимович сатабыллаах уонна улахан дьулуурдаах киэҥ далааһыннаах үлэтин түмүгэр билиҥҥи Саха сирэ үөскээн турар. Регионнарга самостоятельность биэриэххэ. Кинилэр бэйэлэрин интириэстэрин үрдэтиэххэ сайдалларыгар, оччоҕуна Арассыыйа сайдыаҕа. Онон регионнар былаастара улааттаҕына бэйэлэрин кыһамньылара экономиканы сайыннарыыга интириэстэрэ үрдээтэҕинэ Арассыыйа оччоҕуна күүһүрөҕэ диэн тыл эппитэ».

Онон Михаил Николаев Саха сирин эрэ буолбакка бүтүн Арассыыйа историятыгар сүҥкэн суолталаах салайааччы. Кини аан дойду үрдүнэн бэйэбит сайдар суоллаах-иистээх норуоппут диэн өйү-санааны иҥэрбитэ.

Сергей Местников, СӨ Бырабыыталыстыбатын бэрэссэдээтэлин солбуйааччы: «Биһиги норуоппут дьолугар маннык салайааччы төрөөн-үөскээн, уустук кэмҥэ салайан, эппиэтинэһи бэйэтин илиитигэр ылан инникигэ сирдээбитэ. Норуоппут үйэлэрин-саастарын тухары махтал тылларын этэ туруохтара».

Кырдьык да кини үлэлиир кэмигэр ис баалабай бородууктаны оҥоруу көрдөрүүтэ дойдуга 71 миэстэттэн 15 миэстэҕэ диэри күүскэ тахсыбыта, итини сэргэ нэһилиэнньэ дьарыктаах уонна харысхаллаах буолуутун көрдөрүүтэ 10 бастыҥ регион иһигэр  киирбитэ.  Улуу киһибит көмүс уҥуоҕа Свято-Троицкай Таҥара дьиэтин тэлгэһэтигэр хараллан сытар. Манна билигин мемориальнай комплекс тутуута барар.

Владимир Егоров, Үүнэр көлүөнэ пуондатын генеральнай дириэктэрэ: «Билигин бетоннай үлэлэр бүттүлэр. Стелаҕа киириэхпит, гранитынан облицовка, стендалар, ыскамыайкалар төгүрүччү туруохтаахтар. Челябинскай уобаластан гранит оҥоһуктар кэлэ тураллар».

Бу тутуу саха норуотун күүс ылар ураты тыыннаах сирэ буолуоҕа. Михаил Ефимович сырдык аата үйэлэр тухары умнуллуо суоҕа, оттон кини саха норуотун сайдыытыгар оҥорбут үтүө, дьоһун кылаата өссө дириҥээн иһиэҕэ.