Өрөспүүбүлүкэ улуустарыгар тутуу үлэтэ тэтимнээхтик барар

Ньурба улууһун киинигэр бүтүн улууска суолталаах эбийиэк дьэндэтиллэ турар. 3 мэндиэмэннээх таас дьиэҕэ олохтоох нэһилиэнньэ сытан эрэр эмтэнэр буолуоҕа.

Таас балыыһа 3600 кв.м. иэннээх. Манна 36 сытан эрэ эмтэнэр хостор баар буолуохтара. Эбийиэк мэдиссиинэ аныгы ирдэбилигэр толору эппиэттиир гына тутуллуоҕа диэн тутар тэрилтэ иһитиннэрэр. Үлэ болдьоҕунан тымныы түһүөр диэри  итиититэ барыта киириэхтээх.

Александр Ханин, тутар тэрилтэ бэрэссэдээтэлин солбуйааччы: «17 чыыһылаҕа хантараак баттастыбыт уонна ахсынньы бүтүөр диэри сабыахтаахпыт, ититии ситимин киллэриэхтээхпит».

Маны кытары тэҥҥэ Ньурбаны кытта ыаллыы сытар Антоновка бөһүөлэгэр кик-буоксаҕа аан дойду чемпион, Ньурбалар тумус туттар уоллара Александр Иванов аатын үйэтитэр сыаллаах спортивнай сааланы тутуу үлэлэрэ ыытылла сылдьаллар. Саҥа тутулла турар эбийиэк интернааттаах буолуоҕа.

Ньурба улууһа боксердарынан аатырар. Бу хайысхаҕа манна улахан болҕомто ууруллар. Онон саҥа эбийиэк үгүс спортсменнары чочуйан таһаарара саарбаҕа суох.

Санатар эбит буоллахха, эһиил 2027 сыллаахха Ньурба улууһугар 9 төгүлүн Саха норуотун спортивнай оонньуулара ыытыллыаҕа. Ол чэрчитинэн манна спортивнай-чэбдигирдэр киин уонна стадион  тутулла тураллар.

Павел Матвеев, тутуу прорааба: «Манна трибуна сыбааркалыы сылдьабыт. Сэндвич-панель монтажтыы сылдьабыт уонна туспа биригээдэ благоустройстваҕа кэллилэр, олор эмиэ үлэлии сылдьаллар».

Дьэ, бу курдук күөх Ньурбаҕа баараҕай эбийиэктэри тутуу үлэлэрэ  үгэннээн тураллар.