Үөһээ Бүлүү улууһун киинигэр уу ситимин тардыы үлэтэ көхтөөхтүк барар

Үөһээ Бүлүү нэһилиэгин олохтооҕо, 74 хаарын уулларбыт Георгий Степанов күн солото суох олбуоругар үлэлиир. Бу соторутаҕыта кини дьиэтигэр уу ситимэ тардыллан, күнү быһа турба нөҥүө уу кэлэ турар. Тэлгэһэтигэр оҕуруот бөҕө олордуллубут. Онон нэһилиэк ытык кырдьаҕаһар бу уу киириитэ олоҕун усулуобуйатын тупсарда да, чэпчэттэ.

Георгий Степанов - Үөһээ Бүлүү нэһилиэгин олохтооҕо: «Манна олорор ыаллар үксүлэрэ эдэр ыаллар. Оҕуруоттаахтар уонна бэйэлэрин кыахтарынан хортуоппуй уонна да атын үүнээйини, сибэккини олордоллор. Онно уу хайаан да наада, уу диэн олох тыына буоллаҕа. Уу киирбитигэр нэһилиэкпит дьаһалтатыгар улахан махталлаахпыт диэххэ наада».

Быйыл Үөһээ Бүлүү нэһилиэгэр тыа хаһаайыстыбатын сыла биллэриллэн турар. Ол чэрчитинэн манна олохтоохторго араас бырагырааманан үлэлэр оҥоһулаллар. Оҕуруот аһын өлгөмнүк ылыыга туһуламмыт үлэ биир хайысхатынан  уу ситимэ буолар диэн нэһилиэк аҕа баһылыга Максим Силигиянов кэпсиир. 

Максим Силигиянов, "Үөһээ Бүлүү нэһилиэгэ" МТ баһылыга: «Бу 21 үйэҕэ олорон уу ситимэ суох олорор диэн киһи өйүгэр баппат. Ол иһин биһиги эрдэ 2022 сыллаахха киллэрбиппит “Чистая вода” бырайыагынан кыттан. Ыраас уу кэлэр Дьокуускай куорат киэнин курдук. 19 км уһуннаах, кыһыннары-сайыннары үлэлиир».

Онон билигин сорох ыалларга сылы төгүрүччү ыраас уу кэлэ турар. Маныаха "Үүннэр көлүөнэлэр пуонадаларын" кытары үлэлэһэн, кинилэр уонна нэһилиэк үбүлээһинэн 42 км водопровод ситимэ ылыллыбыта. "Билиилээх" диэн түөлбэҕэ, 1500 чааһынай дьиэлээх ыалларга уу ситимэ тардылынна. Билигин даҕаны бу сиргэ үлэ барар.

Николай Тумусов, “Үөһээ Бүлүү нэһилиэгэ” МТ дьаһалтатын ОДьКХ-ҕа, тутууга уонна нэһилиэги тупсарыыга кылаабынай исписэлииһэ: «Пластик турбалар бары ууруллубуттара. Өрөмүөннүүргэ судургу. Үлэ барыта былырыын бүппүтэ, быйыл элбэх ыалга киирдэ. Ситиминэн ыраас иһэр уу кэлэ турар».

Бу курдук олохтоох дьаһалта судаарыстыбаннай бырагыраамалларга киирсэн, тыа сирин олохтоохторун усулуобуйатын тупсарарга суолталаах үлэни ыытар.