Үөһээ Бүлүү киин уулуссата өрөмүөннэнэр
Улахан тиэхиньикэ харса-хабара суох сири хаһар. Суолу тутуу үлэтэ саҕаламмытын туоһута нэһилиэк киинигэр үлэ -хамнас күөстүү оргуйар, уулусса сабыллан турар. Киин уулусса аартыгын тутуу үлэтин уһуна 2000-тан тахса миэтэрэҕэ тэҥнэһэр.
"Үөһээ Бүлүү нэһилиэгин Ленин аатынан уулуссатыгар саҥа суолу тутуу үлэтэ ыытыллар. Билигин сири алдьатан саҥа дьапталҕаны кутуу бара турар", - Анастасия Дбрянцева, корреспондент.
Суол хапытаалынай өрөмүөнүн оҥорууну "ФЭСТ" хампаанньа ылыста. Билигин үлэ бастакы түһүмэҕэ бара турар. Ол эбэтэр суол балаһатын саҥардыы. Урукку аартыгы барытын хаһан, суолга хас да дьапталҕалаах гына бүрүйүүлэри ууруу билигин бара турар.
Николай Тумусов, "Үөһээ Бүлүү нэһилиэгэ" МТ дьаһалтатын ОДьКХ-ҕа, тутууга уонна нэһилиэги тупсарыыга кылаабынай исписэлииһэ: "Билигин саамай алдьаммыт 6 сиргэ буорун ыла сылдьаллар. Ылан баран саҥа геотекстиль диэн матырыйаалы уураллар. Итиэннэ эһиил аспааллыырга бэлэмнииллэр. Суол тутуутун бюджета өрөспүүбүлүкэттэн, улуустан уонна нэһилиэктэн".
Салгыы манна сатыы сылдьааччыларга анаммыт тротуардар, бордюрдар, уулусса уота-күөһэ оҥоһуллан барыаҕа. Итиэннэ ардах уута суолу алдьаппатыгар туһуламмыт уу ситимнэрэ туруоруллуохтара.
Уот-күөс, суол ааркалара оҥоһуллуохтара. Онтон эһиил бу суол аспаалынан бүрүллэрэ былааннаннар. Онон манна саамай үөрбүт дьон суоппардар буолаллар.
Валерий Иванов, Үөһээ Бүлүү улууһун олохтооҕо: "Суолбут алдьанан айгыраабытын кэннэ сылдьарга олус охсуулаах этэ. Олус бэрт буолуо этэ аспаалланнаҕына".
Маны кытары тэҥҥэ тустаах улууска Кырыкый уонна Кэнтик нэһилиэктэригэр барар суолу өрөмүөннээһин үлэлэрэ бараллар. Эбэҕэ тиийэр, өрүс туорааһыныгар диэри суол оҥоһуллар. Уопсайынан бу хайысхаҕа үлэ тэтимнээхтик барар. Ону Ил Дархан Айсен Николаев оробуочай сырыытыгар кэлэ сылдьан үчүгэйинэн сыаналаата.
Айсен Николаев, СӨ Ил Дархана: "Билигин суоллар оҥоһулла сылдьаллар. Киин уулуссаҕа үп көрллэн үлэ саҕаламмыт. Быйыл былааннаммыт үлэ хаачыстыбалаахтык оҥоһуллуо диэн эрэл баар".
Манна даҕатан эттэххэ, өрөспүүбүлүкэ суолларын оҥорууга өссө эбии 126 мөллүйүөн солкуобай, онтон 112 мөллүйүөнэ улуус аартыктарын оҥорууга ыытыллынна.
