Бөҕү наардыыр комплекс алтынньыга үлэлиэ

Ирбэт тоҥҥо саҥа көрүҥ тутуу. Бу курдук бөҕү наардыыр тэрил хаһан да манна тура илигэ. Онон барыта сонун. Таҥыы үлэтин собуот  уопуттаах исписэлиистэрэ бэйэлэрэ кэлэн  оҥороллор. "Грохот" диэн ааттаах наардыыр тэрил улахан чааһа номнуо турбут.

Мария Дмитриева, корреспондент: “Бөҕү наардыыр комплекска киһи илиинэн үлэтэ солбуллубат күүс буолуоҕа. Бу көстөр конвеердарга 15 киһилээх икки симиэнэнэн үлэ ыытыллыаҕа. Кинилэр икки өттүгэр тураннар наадалааҕын араарыахтара”.

Ол курдук күннээҕи быраҕыллыбыт тобохтон бөдөҥ кээмэйи илиинэн наардыахтара.Хордуоҥканы, өстүөкүлэни, пластигы  уонна тимири. Оттон бытархай чааһын бу оборуудабанньа бэйэтэ араарыаҕа. 

Александр Царьков, оборуудабанньаны таҥар тэрилтэ үлэһитэ: “Барабан бытархай бөҕү арааран аллараа конвеерга түһэриэ. Онно магнит тимирин сыһыаран ылыа”.

Уопсайа сылга 150 тыһыынча туонна бөх бу тэрил нөҥүө ааһыа. Бастаан билигин үлэлии турар сыбаалкаҕа брекеттары оҥоруохтара. Онтон манна кэлиэҕэ. 50 тахса сыл үлэлиир туолан турар бөҕү тоҕор сир бу комплекс үлэлээтэҕинэ  босхолонуохтаах итиэннэ  Маннык наардааһына суох буолан үлэлэтин саҕалаабакка турбут саҥа полигон үлэлиэ. 

Герасим Кириллин,  "Якутскэкосети" тэрилтэ сүрүн исписэлииһэ: “Бу наардыыр комплекс уопсай бөхтөн 31,3% туһалааҕын арааран ылыа. Онтон хаалбыта Бүлүүлүүр суол 27 килэмиэтиригэр саҥа полигоҥҥа барыа”.  

Онтон уматыллар бөххө анаан бу курдук икки оһох ылыллыбыт. Сылга 24 тыһыынча куубу уоттуохтара. бу Дьокуускайга бөҕү сөпкө харайыыга улахан хардыы буолуоҕа. 

Мария Дмитриева, корреспондент: “Бу турар икки оһох Саха сирин инженердэрин айыыта. Бөҕү араара комплекска холоон көрүү быһыытынан турдулар. Онтон бэйэтин көрдөрдөҕүнэ уопуту атын регионнары кытта үллэстиэхтэрэ. 1200 кыраадыска тиийэ итийэр, манна медицинэ тобохторун уонна араарыыттан хаалбыт бөҕү уматыахтара”. 

Бу тэриллэр барыта бҕөү наардыыр комплекс иһигэр киирэллэр. Сүрүн автоматизированнай систиэмэ таҥыыта бүттэҕинэ, үрдүнэн ангар быһыылаах дьиэ тутуохтара.

Альберт Тарабукин,  "Якутскэкосети" тэрилтэ генеральнай дириэктэрин солбуйааччы: “Оборуудабанньаны туруоруу балаҕан ыйын 15 диэри бүтүөхтээх. Линия толору үлэҕэ алтынньы 1 күнүгэр киириэхтээх. Маны тэҥэ атын тутууларын ыыта сылдьабыт. Бүлүүлүүр суол 9 килэмиэтиригэр бөх тутар ыстаансыйа тутуутун саҕалыахпыт ”.  

Онон алтынньы саҥатыгар бу саҥа наардыыр сир үлэлээн саҕалаатаҕына эргэ сыбаалка үлэтэ тохтуоҕа. Итиэннэ саҥа полигон күүһүгэр киириэҕэ.