Киин куоракка оҕолор түүҥҥү кэмҥэ сырыыларын хонтуруоллуур риэйдэлэр ыытылаллар

Бу 4 оҕо автобус тимир көлөҕө мээнэҕэ киирбэтилэр. Дьокуускай куоракка түүн 2 чаас онтон сокуоннай саастарын ситэ илик оҕолор уулуссаны мээрэйдии сылдьалларын ис дьыала уорганнарын үлэһиттэрэ буллуллар. Бэрэбиэркэ түмүгүнэн оскуола оҕолоро, төрөппүтэ суох сылдьаллара быһаарылынна. Оҕолору ким да кэлэн ылбата. Онон кинилэри полиция салаатыгар илдьэллэр.

Муус устар 14 кунун 2010 сылыгар тахсыбыт 529-IV  нүөмэрдээх  уураҕар олоҕуран оҕолор киэһээ 23:00 чаастан сарсыарда 6 чааска диэри төрөппүттэ суох общественнай, аһыы утах атыылааннар, оонньуур, компьютернай кулууптарга  онтон да атын оҕоҕо соччото суох дьайыылаах миэстэлэргэ сылдьаллара бобуллар. Бу чэрчитинэн Ис дьыала министиэристибэтэ нэдиэлэ аайы маннык барыллаах риэйдэлэри ыытар.

Эргэ куорат түөлбэтэ урукку кэмнэргэ Дьокуускай саамай ураты суолталаах, туристар сылдьар бэлиэ миэстэлэринэн ааҕыллара. Билигин манна үгүс кафе, бар арыллан эдэр ыччат мустар, иһэр-аһыыр сиригэр кубулуйда. Бу да күн манна үгүс ыччат сылдьара бэлиэтэннэ.

Марианна Яковлева, СӨ ИДьМ буруйу кэспит сокуоннай саастарын ситэ илик оҕолору тутар киин иниспиэктэрэ, полиция хаппытаана: «Киэһээ 23:00 чаастаан сарсыарда 5:00 чааска дылы уулуссаҕа көрөбүт хайдах оҕолор сылдьалларын, докумуоннарын бэрэбиэркэлиибит, Госуслуги нөҥүө көрдөрүөхтэрин сөп».

Билигин сайыҥҥы сынньалаҥ кэмигэр түүҥҥү уулуссаҕа ыччат, оҕо үгүс. Полиция үлэһиттэрэ иһитиннэрэллэринэн риэйдэ биир күнүгэр 15:20 оҕо комендаант чааһын кэспитэ биллэр. Аҥардас бэс ыйыгар 255 сокуоннай саастарын ситэ илик оҕо тутуллубут.

Татьяна Другина, СӨ ИдьМ учаскуобай боломуочунайдар салааларын сокуоннай саастарын ситэ илик оҕолор чаастарыгар ураты дьаһал ылыллар салаатын иниспиэктэрэ, полиция майора: «Тутуллубут оҕолору аан бастаан миэстэтигэр төрөппүттэрин ыҥырабыт, ону холобура онно кэлбэт түбэлтэлэригэр, эбэтэр оҕолор сыыһа дааннайдары этэр буоллахтарына полиция отделыгар тиксэрэбит, арыгы испит оҕолор буоллахтарына хайаан даҕаны наркологическай диспансерга освидетельствование ааһаллар, ол түмүгүнэн административнай эппиэтинэскэ тардыллаллар уонна профилактическай учуокка туруораллар».

Онтон учуокка турубут оҕо дьылҕата хайдах буоларын хас биирдии төрөппүт олус үчүгэйдик билэр. Онтон маннык оперативнай тэрээһиннэр хас нэдиэлэ аайы ыытылаллар.