Айылҕа харыстабылын министириэристибэтэ суруналыыстарга пресс-туур олохтоото

Баараҕай кээмэйдээх теплицаҕа инникитин күөх тыа буолуохтаах бэрдьигэстэр үүнэллэр. Бэсчээннэр сиэмэнэн буорга анньыллыбыттара икки ыйтан ордубут. Номнуо 5-6 см үрдүктээх буолбуттар. Бу "Якутлесресурс" тэрилтэ питомник тэринэн үлэлэппитэ быйыл иккис сыла. Онон мөлүйүөн аҥаара маһы олордор кыамталаах тэпэлииссэ былырыыҥҥыттан толору кыаҕынан үлэлиир.

Максим Прокопьев, "Якутлесресурс" тэрилтэ генеральнай дириэктэрин солбуйааччы: «Быйыл манна 480 тыһ. бэс маһын олортубут. Эһиир ойууру бөҕөргөтүү үлэлэригэр туттуллуохтара».

Туһааннаах тэрилтэ быйыл 700 гектар иэннээх уот сиэбит сиригэр мас олордуо. Маныаха былырыыҥҥы бэрдьигэстэрин туһаныа. Миэстэтигэр сиэмэттэн тыллыбыт үүнээйи Саха сирин тыйыс усулуобуйатын тулуйумтуо буолар итиэннэ үп өттүнэн барыстаах.

Ууну кутуу автоматика көмөтүнэн барар. Онон бу үлүгэрдээх улахан кээмэйи аҕыйах киһи холкутук көрөр. Суруналыыстарга уопуттаах агроном Анатолий Сычев питомник үлэтин билиһиннэрэр. Кини этэринэн быйыл  үүнүү былырыыҥҥытааҕар түргэн. Маныаха эдэр натуралистар көмөлөрө улахан. 

Кирил Сычёв, "Якутлесресурс" тэрилтэ мас олордор питомнигын үлэһитэ: «Я юный натуралист. Я занимаюсь выдергиванием сорняков пока что. Работа мне нравится, я пришел сюда по приглашению. Очень много рассказывают о лесе, о том, что это будет засаживаться».

Күөх пионердар суруналыыстары тэтимнээх үҥкүүнэн көрсөллөр. Өрөспүүбүлүкэ бары улуустарыттан айылҕа харыстабылыгар туруулаһар, тулалыыр эйгэни харыстыыр бырайыактардаах 100 бастыҥ оҕо мустубут. Сүлүөт быйыл 10 сылын ыытыллар.

Ньургуйаана Гуринова, СӨ айылҕа харыстабылын министиэристибэтин сүрүннүүр исписэлииһэ: «Бу сүлүөт иһинэн оҕолор бэйэлэрин бырайыактарын көмүскээннэр, былакаат уруһуйдааннар, билсиһэннэр, биһиги инники көлүөнэбит айылҕабытын хайдах харыстыырбытыгар».

Ону таһынан оҕолор балыгы үөскэтии, бөҕү ыраастааһын курдук сытыы кыһалҕалары кытта билсэллэр, ону таһынан айылҕаны харыстааһыҥҥа ааттаах-суоллаах дьону кытта атах тэпсэн олорон кэпсэтэллэр.  Бу курдук ыччаты кыра саастан тулалыыр айылҕаны харыстыырга болҕомто улахан. Маныаха үгүс өрүттээх үлэ түмүгэр Саха сирэ умайбыт тыаны чөлүгэр түһэриигэ Арассыыйа бары регионнарын кэннигэр хаалларан бастыҥ иһэр. Бу сылга 10 тыһыынча гектаратан тахса иэннээх сири олордуллуо.