Сунтаар уонна Эбээн Бытантай улуустарыгар ыксаллаах быһыы эрэһиимэ биллэрилиннэ

Күүстээх уу сүүрүгэ өрүс кытылын тоҕо алдьатар. Маннык дохсун уу хас эмэ хонугу быһа Сунтаар улууһугар кутан, билигин оройуоҥҥа ыксаллаах быһыы-майгы эрэһиимэ олохтонон турар. 100 тахса уһаайба, 9 олорор дьиэ ардах халааныгар бардылар. Сунтаар 400 тахса олохтооҕо сайыҥҥы халаан диэн тугун билиллэр. Билигин улуус киинигэр итини туоратар үлэлэр ыытылаллар.

Эдуард Филиппов, "Сунтаар нэһилиэгэ" МТ баһылыга: «Экскаватордар тахсан үлэлээтилэр уонна баһаарынай сулууспа, быыһааччылар уонна олохтоохтор бэйэлэрэ таҕыстылар».

Хоту эҥээр чуолаан Эбээн-Бытантайга балаһыанньа эмиэ уустук. Манна эмиэ ыксаллаах быһыы-майгы эрэһиимэ олохтонон турар. 24 уһаайба, ол онно 77 олохтоох халаантан эмсэҕэлээтилэр. Саккырыыр орто оскуолатыгар эвакуационнай пуун арыллан үлэлии турар. Билигин манна кытылы бөҕөргөтөр үлэлэр ыытылаллар.

Иннокентий Андросов, СӨ быыһыыр сулууспатын салайааччыта: «Кэтээн көрө олоробут, Эбээн Бытантай улууһугар хайаларга 44 мм сууккаҕа түһэн турар. Ардах билиҥээҥҥэ диэри түһэ турар».

Үөһэттэн уу буоллаҕына, аллараа уот турар. Төһө да сорох оройуоннарга хойуу сөҥүү түстэр, атын улуустар умайа олороллор. Күн бүгүн өрөспүүбүлүкэ үрдүнэн 18 ойуур баһаара баара бэлиэтэнэр. Умайбыт сир иэнэ 34833 гектарга тэҥнэстэ. Билигин сүрүн болҕомто Уус-Майа улууһугар.

Борис Кручинин, «Авиалесоохрана» авиационнай бөлөҕүн хамандыыра: «Уус Майа оройуонугар икки ойуур баһаара умуруорулунна. Уопсай иэнэ 150 га. Уоту умулларыыга 36 Авилесоохрана уонна 47 Якутлесресурс үлэһиттэрэ кытыннылар. Сарсыарда кэтээн көрөр 7 сөмөлүөт, ол таһынан 2 Ми-8 бөртөлүөт Уус Майа оройуонугар күүс-көмө таһыытыгар үлэни оҥоро сылдьаллар».

Амма оройуона эмиэ умайар. Манна билигин 1622 гектар иэннээх сиргэ хара тыа күүдэпчилэнэр. Ону тохтотор сыаллаах манна көдьүүстээх үлэ барар. Маныаха Үөһээ Халыма улууһугар 39 гектар иэннээх сиргэ уоту умуллардылар. Уопсайа уоту утары 300 киһи уонна 2 улахан кыамталаах тиэхиньикэ үлэлии сылдьаллар.