Сайыҥҥы ардах халаана

Бу көстөр каадырдарга Сунтаар улууһугар ардах түһүүтүн содула көстер. Хас эмэ күн устата түспүт сөҥүүлэр суолу-ииһи кытары алдьаттыллар. Федеральнай таһымнаах аартыкка балаһыанньа бу курдук.

Онтон бу Өлүөхүмэ оройуона. Өлүөнэ эбэ эмиэ хаатыттан тахсан оттуур ходуһалар, бааһыналар ууга бардылар. Өлүөхүмэни кытары кыраныыссалыы сытар Хаҥалас улууһун Иһитигэр уу таһыма үрдээн от хаамыыта атахтанна.

Михаил Максимов, "Иһит нэһилиэгэ" МТ баһылыга: «Уу кэлбитэ 1567 см буолла, критическайбыт 1992. Сууккаҕа 94 см кэллэ. Уу барарын кэтэһэбит».

Өр сыл устата маннык хойуу сөҥүүлээх ардах түспэтэҕин күнү-дьылы кэтээн көрөр сулууспа бигэргэтэр. Ардах халаана үгүс күчүмэҕэйи үөскэттэ.

Өрөспүүбүлүкэ сүрүн өрүһүгэр онон билигин сылдьыы сэрэхтээх. Чуолаан түүҥҥү кэмҥэ. Тустаах биэдэмистибэ исписэлиистэрэ  суудунаны ыытааччылары бу күннэргэ сэрэхтээх буоларга ыҥырар.

Татьяна Степанова, ЫБМ СӨ салалтатын уу эбийиэктэригэр куттал суох буолуутугар салаатын салайааччытын солбуйааччы: «Убаастабыллаах суудуна ыытааччылара, уу эбийиэктэригэр тахсаргытыгар туманнаах, хараҥа кэмҥэ сылдьыбатах ордук. Бытааннык, болҕомтолоохтук биэрэк устун айаннаан».

Киин куорат уулуссалара күөлгэ кубулуйдулар. Ардах содула суоппардарга, да сатыы сылдьааччыларга күчүмэҕэйдэри үөскэтэр. Хоммунаалынай сулууспа үлэһиттэрэ күүһүрдүллүбүт эрэһиимҥэ үлэлииллэр. Сүрүн болҕомто кыһалҕалаах уулуссаларга.

Юрий Спиридонов, "Жилкомсервис" тэрилтэ салайааччыта: «Сүрүн уулуссаларга олбуордартан уу киирэр. 3-4 смена аайы массыыналар киирэннэр ууну хомуйан тахсаллар. Ол үрдүнэн туола турар».

Ардах халаана бырабыытылыстыба таһымыгар хонтуруолга ылыллынна. Анал суһал ыстаап тэриллэн үлэлиир. Хоту улуустарга балаһыанньа эмиэ уустук, онно олорор дьиэлэр, уһаайбалар ууга бардылар.

Иннокентий Андросов, СӨ быыһыыр сулууспатын салайааччыта: «Эбээн Бытантайга Баатаҕай Алытыгар 20-чэ дьиэ уонна 5 муоста суураллан турар. Өрөспүүбүлүкэ туһааннаах министиэристибэлэрин болҕомтолоругар сылдьаллар».

Билигин бу тахсыбыт балаһыанньанан хормуньуну суоттуур үлэлэр саҕаланыахтара. Онтон манна даҕатан эттэххэ, хойуу сөҥүү өссө даҕаны нэдиэлэ кэриҥэ түһэр чиничилээх.