Саха сиригэр 27 тыһыынча туонна үүт соҕотуопкаланна

Пууҥҥа кэлбит үүт анал сойутар иһиккэ кутуллар. Билигин сайын ортото буолан үрүҥ илгэ саамай элбээн турар кэмэ. Онон Хатырык нэһилиэгин күннээҕи орто кээмэйэ туоннаҕа тэҥнэһэр. Валентина Данилова быйыл 21 сылын үүт пуунугар үлэлиир. Билиҥҥи ирдэбилинэн хас биирдии туттарааччыттан күн ахсын боруоба ылар. Онтон барыта үчүгэй буоллаҕына тутар.

Валентина Данилова, үүтү тутар пуун үлэһитэ: «Үүт туттарааччы 14 киһи баар, онтон үксэ улахан аҥара самозанятай, 3 бааһынай хаһаайыстыба, биир эдэр фермер. Быйыл өссө 3 киһи эдэр фермер буолаары туттара киирбиттэрэ».

Үүт харчыта кэмигэр кэлэрин олохтоохтор үллэстэллэр. Онон сайыҥҥы кэмҥэ эбии дохуот аахсаллар. Өрөспүүбүлүкэҕэ соҕотуопка былаанын толорууга бу Хатырык үүтү тутар пуунун  курдук тэрилтэлэр уонна дьоҕус хаһаайыстыбалаахтар сүрүн күүс буолаллар.

Григорий Дьяконов, үүт туттарааччы: «7 ынахтаахпын, ону туттара сылдьабын. Күҥҥэ 50 тахсаны туттарабын. Быйыл үүт үчүгэй этэ, аччаата. Мантан күһүн эбиллэр ини».

Хатырыкка кэнники сылларга сүөһүнү тутууга эдэр дьон ылсыыта элбээбит. 23 саастаах Василий Охлопков анал байыаннай эпэрээссийэттэн кэлэн баран, хаһаайыстыба тэринэргэ санаммыт. Быйыл номнуо 2 туонна үүтү туттарбыт.

Василий Охлопков, үүт туттарааччы: «Быйыл 6 төбөлөөхпүн. Агромотиватор диэн грааҥҥа кыттаары куурус, үөрэх бөҕөтүн ааспытым. Сотору саҕаланыахтаах».

Онон хатырыкка сүөһү ахсаана сыллата эбиллэр. Күн бүгүн тыһыынча кэриҥэ хороҕор муостаах иитиллэр. Маныаха бэтэринээр тиийбэтин кыһалҕата олохтоохтору  атахтыыр. Ону тэҥэ күн-түүн үрдүү турар сыана.

Надежда Жиркова, үүт туттарааччы: «Сыл аайы үүт туттарабыт, 5 ынаҕы ыыбыт. Күннээҕи үүппүт 40 буолар. Билиҥҥи ирдэбилинэн Меркурий диэн бырагыраама баар, онон телефонунан киллэрэн иһэбит. Быйыл сыана үрдээн аҕыйаҕы ыыр дьоҥҥо ночооттоох курдук буолбут».

Күн бүгүн Саха сиригэр 27 тыһыынча туонна үүт соҕотуопкаламмыт, ол эбэтэр  уопсай былаантан 46%. бу көрдөрүү ааспыт сыллааҕар таһынан.