Тыатааҕы дьонноох сиргэ тахсыыта эмиэ элбээтэ

Дьиэҕэ киирбит, өссө иккис этээскэ тахсан саспыт. Дьону билиммэт тыатааҕы Алдан Хатыстыырыгар бултанна.  Тиистэрэ улахана, атаҕа баараҕайа. Дьолго ким да эмсэҕэлээбэтэ.

Өссө биир түбэлтэ Орто Халымаҕа бэлиэтэннэ. Манна эмиэ чааһынай дьиэ тиэргэнигэр киирбит адьырҕа кыылы бултаатылар. Учуонайдар этэллэринэн саамай сэрэхтээх эдэр эһэ буолар.

Николай Мамаев, РНА СС криолитозона биологическай кыһалҕаларын институтун научнай үлэһитэ: «Үчүгэй сирдэри улахан атыырдар ылан олороллор, онтон улахан тыһылар кэлэллэр, онтон эдэр кыыллар үчүгэй сири көрдөөннөр дьон баар сиригэр киирэллэр уонна сүөһүлэргэ саба түһэллэр, үксэ эдэр эһэлэр буолаллар».

Билигин сир аһын үгэнэ. Саха сирин кэрэ аҥардара күнү-күннээн тыаҕа сылдьаллар. 

Быйыл дьэдьэн маска эрэ үүммэтэх диэн олохтоохтор үөрэ кэпсииллэр.  Сир аһын  көрдөөн ырааҕынан чугаһынан кутталы умнан туран сылдьабыт. Маннык сиргэ улаханнык санаран бааргытын биллэриэхтээххит уонна ас тобоҕун хаалларыа суохтааххыт. 

Тыатааҕы икки атахтааҕы кытта иирсээнэ сыл ахсын уларыйбат кыһалҕа буолла. Ахсаана аччаабат, булчут бултаһарга интэриэһэ суох. Ол сүрүн  кыһалҕа. 

Егор Дьяконов, СӨ булт хаһаайыстыбатын департаменын салайааччытын солбуйааччы: «Кэлиҥҥи сылларга эһэн анаан-минээн бултаһа сатаабаттар. Холобура, 2,5-3 тыһ. курдугу сыл аайы көрөбүт, онтон 600-700-кэ эрэ бултанар».

Онтон бу суолга дьонтон ас көрдүүр тыатааҕы. Олох да дьиэтийэн, киһиттэн куттаммакка ас көрдөөн массыынаҕа чугаһыыр. Исписэлиистэр кыылы мээнэ аһатыман, кэлин дьоҥҥо кутталы үөскэтиэн сөп диэн сүбэлииллэр.