Оҕону оскуола иһинэн урбаан эйгэтигэр уһуйуу

Хатастааҕы агро хайысхалаах оскуола үөрэнээччилэрэ бастакы оҕурсуларын хомуйбуттара ыраатта. Быйыл үүнүү үчүгэй дииллэр.

Үлэнэн сынньалаҥ диэн маны этэллэр. Лааҕыр оҕолоро хас күн аайы сарсыарда 9 чаастан үлэлээн саҕалыыллар. Бастакы уочарат оҕурсуларыгар уу куталлар. Куйаас күннэр тураннар оҕуруот аһа элбэх ууну ирдиир.

Агро оскуола 3 теплицалаах. Онно барыта оҕурсу үүнэр.

"Бүгүҥҥү күҥҥэ Хатас оскуолатын оҕолоро күҥҥэ уонча оҕурсуну хомуйаллар", - Күннэй Аар, корреспондент.

Оҕурсу тута оҥорон таһаарыыга барар. Бу курдук туустаан-тумалаан, ыл да сиир гына онорон атыыга таһаараллар. Бородууксуйа тута хамаҕатык атыыланар, күн аайы бүтэ турар.

Николай Матвеев, Хатастааҕы агро хайысхалаах оскуола дириэктэрин солбуйааччы: "Оскуола таһынааҕы сирбитин быйыл үчүгэйдик сөргүттүбүт. Ол курдук мас олортубут, күрүөлээтибит уонна оҕурсу олордор 3 тэпэлииссэни оҥордубут. Оҕурсубутун тута оҥорон таһааран атыыга бэлэмниибит".

Маны таһынан оҕолор өссө аһаҕас халлаан анныгар үүнэр оҕуруот астарын көрөллөр-истэллэр. Биэрэс, редискэ, хаппыыста, сүбүөкүлэ. Быйыл үүнүү эмиэ үчүгэй. Лааҕыр иккис сезонугар 35 оҕо сылдьар. Оҕуруот аһын таһынан үөрэнээччилэр кучу от хомуйан, хатардан, чэй оҥороллор.

От хомуллан кэллэ уонна тута анал оборуудабанньаҕа илдьиритиллэр. Оҕолор  сатабыллаахтык тутталлар. Үөрүйэхтэр. Бу кэннэ остуолга тэнитэ ууран хатардаллар. Салгыы анал хахха угуллан, иһэргэ бэлэм буолар.

Татьяна Стручкова, бородууксуйаны оҥорон таһаарыы  үөрэҕин маастара: "Сүрүн үлэбит чай хомуйааһына. Чэй отун хомуйааһын бэйэтэ туспа уратылаах. Ол ирдэбили оҕолору кытта тутуһабыт. Сарсыарда 9-12 диэри хомуйабыт".

Хатастааҕы агро оскуола бу курдук сайын аайы бэрт таһаарыылаахтык үлэлиир-хамсыыр. Сыл аайы онорон таһаарар бородууксуйата тупсар уонна элбии турар. Маныаха оҕолор көмөлөрө олус улахан суолталаах.

Клим Хастаев, Хатастааҕы агро хайысхалаах оскуола үөрэнээччитэ: "Лааҕырга кэлэн баран бастаан аһыыбыт. Онтон 12 чааска диэри үлэлиибит. Онтон эбиэттиибит".

Оскуола өрөспүүбүлүкэ биир бастыҥ агро хайысхалаах үөрэх тэрилтэтэ буолар. Оскуоланы бүтэрээччилэр тыа хаһаайыстыбатын араас салаатыгар  идэлэри талан үлэлииллэр. Үөрэх кыһатыгар дьон көмөтө элбэх. Үөрэх дьаһалтатын салалтата, дьарыктаах буолуу киинэ уонна тыа хаһаайыстыбатын дьаһалтата эрэ буолбакка Хатас нэһилиэнньэтэ эмиэ көмө илиитин уунар.

Николай Матвеев, Хатастааҕы агро хайысхалаах оскуола дириэктэрин солбуйааччы: "Махтаныам этэ Хатас нэһилиэгин дьонугар. Биһиэхэ урбаанньыттарбыт уонна бииргэ үлэлэһэр дьоммут куруутун көмөлөһөллөр".

Мантан сайын салгыы күүстээх үлэ. Оҥорон таһаары көрдөрүүтүн өссө тупсарар былааннаахтар.