Саҥа төрөөбүт кырачааннары Дьиэ кэргэн күнүгэр үөрүүлээхтик атаары тэрээһинэ ыытылынна

Михаил Ефимович Николаев аатынан Национальнай мэдиссиинэ киинигэр Дьиэ кэргэн, таптал уонна  бэриниилээх буолуу  күнүн бэлиэтээн саҥа төрөөбүт оҕолору үөрүүлээх быһыыга дьиэлэригэр таһаардылар.  7 күн күбэй ийэ бүгүн ис сүрэхтэриттэн долгуйдулар. 

Алена Попова, ийэ: «Наһаа үчүгэйдик түбэһэн хаалла. Отой долгуйбуппут. Үчүгэй баҕайытык тэрийдилэр быраастар, медсестралар көмөлөрүнэн».

Үөрүүлээх тэрээһиҥҥэ судаарыстыбаннай уорган үлэһиттэрэ кэлэн эҕэрдэлээтилэр, бэлэхтэри туттардылар. Биир ийэ игирэ оҕолонон ураты суолталаах күн буолла.

Прасковья Павлова, Перинатальнай киин дириэктэрин солбуйааччытын эбээһинэһин толорооччу: «Перинатальнай киин аатыттан бу бүгүҥҥү үөрүүлээх быраһынньык күнүнэн Саха сирин ыалыгар эҕэрдэбитин тириэрдэбит, оҕолор дьоллоох, доруобай буолуннар уонна үүнэ-сайда турдуннар».

Бырааһынньык сүрүн чааһын кэнниттэн ийэлэри уонна оҕолору дьиэ кэргэттэрэ эҕэрдэлииллэр. Бу кэтэһиилээх кырачаан оҕолор дьиэ кэргэн дьоло уонна өрөспүүбүлүкэ инники кэскилэ буолаллар.

Ийэлэргэ министиэристибэ аатыттан оҕо таҥаһын кэмпилиэгин туттардылар, маны сэргэ хас биирдии ийэ социальнай өйөбүл сертификатын туттулар.

Оҕо төрөөһүнүн ахсаана сылтан сыл улаатар. Дойду үрдүнэн оҥоһуллар  араас өйөбүл миэрэтэ манна улахан көмө буолар. Даҕатан эттэххэ, бүгүҥҥү күн сыыппарата ааспыт сыллааҕар номнуо 66 оҕонон элбэх.

Владимир Николаев, Национальнай медисиинэ киинин генеральнай дириэктэрин  солбуйааччы: «Маннык бырааһынньык наада. Дьон үөрүөн-көтүөн наада. Министерстволар кэлэн бэйэлэрэ эҕэрдэлииллэрэ үчүгэй».

Дьиэ кэргэн,  таптал уонна бэриниилээх буолуу күнэ биһиэхэ сүрүн өйдөбүлү аҕалар - ыал буолан олоруу бүтүн уопсастыба төрдө  буолар, оттон хас биирдии оҕо төрүүрэ - төрөппүттэргэ эрэ буолбакка, бүтүн өрөспүүбүлүкэҕэ  суолталаах уонна үөрүүлээх.