Ойуур баһаардарын балаһыанньатын кытаанах хонтуруолга туталлар

Таатта улууһугар муниципальнай таһымнаах ыксаллаах быһыы-майгы эрэһиимэ олохтонно. Бу төрүөтэ Уолба нэһилиэгэр турбут уот буолар. Күн -дьыл туруга өссө эбии итийэн баһаар билигин 4 кылаас үрдүккэ кубулуйда. Күүс барыта ити эҥээр быраҕыллар.

Пётр Уранаев, Таатта улууһун ойуур хаһаайыстыбатын салайааччыта: «Улууска биир улахан ойуур баһаара баар. Уопсай иэнэ 650 га. Баһаары утары 123 киһи уонна 4 тиэхиньикэ үлэлии сылдьар».

Онтон биир улахан кылаастаах баһаардаах - Эдьигээн улууһугар күн бүгүн саамай улахан турбут уоту уммулларбыттарын туһунан "Авиалесоохрана" Саха сиринээҕи салалтата иһитиннэрдэ. Уоту утары туруулаһааччыллар көдьүүстээх үлэлэрин түмүгэ улахан гектаарга тахсыбыт баһаар уҕарыттылар.

Алексей Цой, “Авиалесоохрана” баһаарынай парашюттуур-десантнай бөлөҕүн инструктора: «Эдьигээн оройуонугар Саха сиригэр саамай улахан баһаар тохтотулунна уонна ситэри умулларыыга 200-тэн тахса байыастар үлэлии сылдьаллар. Уоттан харыстабыл эрэһиимэ 13 оройуоҥҥа турар. Уопсайа 662 ПДПС байыастара үлэлии сылдьаллар уонна 15 тиэхиньикэ».

Билигин өрөспүүбүлүкэ үрдүнэн хаһааҥҥытааҕар да сырылҕан итии күннэр тураллар. Сорох улуустарга оннооҕор 35   кыраадыс  бэлиэтэннэ. Онон саҥа уот туруутун түбэлтэлэр үксүүллэрин чэрчитинэн, буола турар баһаардары уҕарытар сыаллаах Ил Дархан Айсен Николаев кыттыыллаах суһал мунньах ыытыллынна. Манна уот турбут улуустарыгар көмө хайдах барарын дьүүллэстилэр. Балаһыанньаны билистилэр.

Дмитрий Садовников, СӨ бырабыытылыстыбатын бэрэссэдээтэлин бастакы солбуйааччыта: «Итии күннэр тураллара кэтэһиллэр уонна баһаардар элбэхтэринэн буолар. Сезон саҕаланыаҕыттан 262 баһаар буолла. Билигин 57 баһаар баарын бэлиэтиибит. Ол онтон 18 баһаарын умуллара сылдьабыт».

Мунньах түмүгүнэн ойуур баһаардара буола турар улуустарыгар өссө эбии көмө күүһү уонна күнүстэри түүннэри хонтуруолу тутарга соруйдулар.