Дьокуускайга электросамокатынан уонна бэлэсэпиэтинэн туһаныы олус элбээбит

Өрөспүүбулэкэ болоссуота. Хас күн ахсын буоларын курдук, самокатынан сылдьар киһи элбэх.  Кэлиҥҥи сылларга бу тиэхиньикэ киэҥник тарҕанан, дьон сэргэ элбэхтик туһанар буолбут. Ол эрэн быраабыланы тутуспакка элбэх кэһии тахсар. Сайын саҕаламмытынан Дьокуускай куорат уулуссаларыгар дьон самокатынан, бэлэсэпиэтинэн айаннаан саҕалаабыттара олус табыгастаах буолбут.

Ангелина Иннокентьева, куорат олохтооҕо: «Мин санаабар кутталлаах соҕус, түргэн баҕайытык айанныыллар».

Ол эрэн, куорат олохтоохторо икки көлүөһэлээх тэрилинэн туттан саҕалаабыттара элбээн, саҥа кыһалҕалар үөскээтилэр. Онон сибээстээн күүстээх сэрэтии үлэтэ барда.

Иванна Петрова, Дьокуускай куорат судаарыстыбаннай инспекциятын отделын младшай лейтенана: «Ааспыт ыам ыйыгар сайыҥҥы сынньалаҥнар саҕаланыахтарын иннинэ оскуолаларга, уһуйааннарга күүстээх үлэ барбыта. Сайыҥҥы кэмҥэ лааҕырдарынан сылдьабыт уонна араас общественнай сирдэргэ сэрэтии үлэтин ыытабыт».

Куораппыт уулуссаларыгар сатыы сылдьар дьон уонна самокатчиктар ардыларыгар суол быраабылатын кэһии, эчэйии элбээтэ. Билигин суол туоруур быраабылатынан көрдөххө, самокат уонна бэлэсэпиэт 14 саастан көҥүллэнэр, онтон электросамокатынан 16 саастан айанныахха сөп. Бу сыл саҕаланыаҕыттан Дьокуускай куорат үрдүнэн 450 тахса суол саахала бэлиэтэммит. Манна 12 киһи электросамокаттаах сылдьан уонна 6 киһи бэлэсэпиэттээх сылдьан түбэспиттэр.

Туйаара Колтовская, куорат олохтооҕо: «Үчүгэйдик сыһыаннаһабын, ол эрэн быраабыланы кэһэр дьоннортон сылтаан хаамарга даҕаны ыарахан буолар».

Дьиҥэр икки көлүөһэлээх тэрилгэ сылдьар дьон олус сэрэхтээхтик айанныахтаахтар: ыраахтан баар дьоннорго сигналлаан сэрэтиэхтээхтэр. Онтон бэлэсэпиэткэ айаннааччылар шлем кэтиитэ, массыына уотугар көстөр бэлиэлэри иилинэллэрэ ирдэнэр.

Холобура, биһиги устар кэммитигэр, өлбөх быраабыла кэһиитин көрдүбүт. Манна 2 да буолан айаннааччылар бааллар.

Иванна Петрова, Дьокуускай куорат судаарыстыбаннай инспекциятын отделын младшай лейтенана: «Куораттааҕы ГАИ суоппардарга болҕомтолоох буолун диэн санатар, суолу туоруур сирдэргэ уонна элбэх киһи мустар сиригэр чугаһаатаххытына эрдэттэн оскуораскытын түһэрин. Сатыы сылдьааччыларга эмиэ санатыам этэ, суолу көҥүллэнэр эрэ сиринэн туораан уонна хайаан да массыына тохтуурун көрөргүтүн умнуман».

Суолга хаама сылдьан киһи улахан эппиэтинэс сүгэр. Бэйэ-бэйэни ытыктааһын, суол быраабылатын тутуһуу уонна болҕомтолоох буолуу куоратпытын куттала  суох оҥорор.