Олонхо Ыһыаҕа Кэбээйигэ 3 күн устата үрдүк таһымнаахтык ыытылынна

"Кырсалыы кылыһахтаан, Куоҕастыы куйуһутан, тахсар күн сардаҥатынан олоҥхолоох олоҕу туойдахпына..." олоҥхону толорооччулар күрэстэрэ туос ураһаҕа аан маҥнайгыттан үгүс дьону түмтэ.  Быйыл Уус Алданнар биир тумус туттар олоҥхоһуттара Николай Бурнашев 150 сылын чэрчитинэн "Кыыс Дэбилийэ"  олоҥхото Уһун Хонуу сыһыытыгар биир бастакынан  дьиэрэһийдэ.

Алина Герасимова, "Олоҥхо ыһыаҕа - 2026" кыттыылааҕа (Уус Алдан улууһа: «Ол олоҥхону талан ылан бүгүн “Кыыс Дэбилийэ” быһа тардыытыттан туойан иһитиннэрдим. Толордум уонна сыалбын-сорукпун ситистим диэхпин баҕарабын. Наһаа үчүгэйдик үөрэ көрүстүлэр, таһыннылар, сэҥээрдилэр уонна Баһылай Илларионов: “Кытаат, улахан тойуксут буолуоххун сөп эбит”, - диэбитигэр санаам наһаа көтөҕүлүннэ».

Кэбээйи ытык сиригэр 19 төгүлүн ыытыллар Олоҥхо ыһыаҕа 3 күн устата ыытыллынна. Ыраахтан -чугастан улуу эпоспытын уруйдуур-айхаллыыр уопсайа 40 култуурунай-спортивнай   тэрээһиннэр аастылар. Үгэс быһыытынан арыллыы сиэрэ туома олоҥхолортон быһа тардан, театрализованнай дьүһүйүү туруоруллубута.

Арыллыы сиэригэр - туомугар үгэс быһыытынан Ил Дархан Айсен Николаев ыалдьыттаата. Ытык Дуоҕаны туруоран, салгыы түһүлгэ устун хааман, кэлбит ыалдьыттары кытары көрүстэ. Олоҥхоһуттары, уустары, илиилэригэр талба талааннаахтары кытары ирэ-хоро кэпсэттэ. Кэбээйи дьонугар махтанна.

Айсен Николаев, СӨ Ил Дархана: «Манна үс улуу Эбэбит: Өлүөнэ, Бүлүү, Алдан холбоһоллор. Манна былыр-былыргыттан хорсун-хоодуот үлэһит дьоннор олороллор. Уонна билигин Өрөспүүбүлүкэ көмөтүнэн Кэбээйигэ диэри суол тиийэн, дьон сэргэ түмсэн, сомоҕолоһон, биир санааннан үлэлээннэр бу кырдьыктыы кыра нэһилиэк диэбэккэ олох улахан сиргэ ыытыллар ыһыах курдук ыытаннар бары бэйэлэрин даҕаны дьоннорун-сэргэлэрин, өрөспүүбүлүкэни барытын даҕаны үөртүлэр диэтэхпинэ сыыһа буолуо суоҕа».

Оҕо түһүлгэтэ Өрөспүүбүлүкэ эдэркээн туойааччыларын түмтэ. Икки күн устата оҕолор Дьулуруйар Ньургун Боотуртан саҕалаан, олохтоох, түөлбэ олоҥхоһуттар олоҥхолорун туойдулар. Нам улууһун эдэр туойааачыта Юрий Мордовской иннин кимэхэ да биэрбэтэ "Сур соноҕос аттаах алтан саар бухатыыр" Митэрэй Кривошапкин  олоҥхотунан кыайыыны ылары ситистэ.

Кэбээйи ытык сирэ 3 күн устата хас эмэ тыһыынчанан киһини олус учугэйдик көрсөн, аһатан-сиэтэн Ыһыах үрдүк таһымнаахтык ааста. Кэлэр сылга 20 үбүлүөйдээх Олоҥхо ыһыаҕа Лиэнскэй оройуонугар ыытыллыаҕа.