"Дипломаты Будущего" аан дойдутааҕы профильнай смена үлэтин салҕыыр

Дьокуускайга "Сосновый бор" оҕо сынньанар уонна сайдар киинигэр 3-с Интеллектуальнай оонньуу "Дипломаты будущего" диэн профильнай смена былааннаммыт тэрээһиннэрэ ыытылла тураллар. "Дипломаты будущего" диэн бырагыраама Саха сириттэн, Арассыыйа 13 регионнарыттан уонна Кытайтан 7 - 17 диэри саастаах 160 тахса оскуола оҕотун түмпүт.

Силиана Аммосова, кыттааччы: «Наһаа сөбүлээтим, элбэх билсиһии баар. Биир күн биэс күн курдук буолар».

Бу тэрээһиннэ оҕолор бэйэлэрин талааннарын сайыннара сылдьаллар. Дьарыктарга сылдьан, үөрэх өттүнэн билии ылаллар, кинилэргэ анаан араас интириэһинэй лекциялары кэлэн кэпсииллэр, инники өттүгэр дойду чиэһин көмүскүүр норуоттар икки ардыларынааҕы аренага кыттарга үөрэтэллэр. Бырагыраама чэрчитинэн бүгүн оҕолорго анаан "Модель ООН" диэн анал дьыалабыай оонньууну оонньоттулар.

Афанасий Канаев, "Бэс Чагда" баһаатайа: «"Модель ООН" диэн улахан таһымнаах тэрээһин буола турар. Оҕоҕо дойду биэрэллэр, ону кини интириэһин көмүскүөхтээх. Оонньу нөҥүө холобурга дьиҥ аан дойдутааҕы кэпсэтии хайдах ааһарын көрөллөр».

Ону тэҥэ смена кыттааччыларыгар анаан Борис Иванович Медведев аан дойдутааҕы быраап туһунан лекция кэлэн ыытта. "Дипломаты Будущего" профильнай смена буолар. Билигин Саха сиригэр эрэ буолбакка, Арассыыйа үрдүнэн "Будущий Дипломат" күрэх ыытыллар.  Бэлиитикэҕэ интириэстээх оҕолор араас эрэгийиэннэртэн кэлэн, үөрэн көтөн, саҥаны билэн, доҕоттордонон бириэмэлэрин атаара сылдьаллар.

Кирилл Жирков, кыттааччы: «Бу лааҕырга кэлэммин астынным, дуоһуйдум. Саҥа атас-доҕор буллум, саҥа үөрэх ыллым».

Оҕолор бэйэлэрин инники олохторугар олус наадалааҕы, саҥаны билэллэр, онтон атын куораттартан ыҥырыллыбыт кыттааччылар өссө Саха сирин култууратын кытары билсэ сылдьаллар.